USA patay sa bangga sa duha ka motorsiklo sa Cebu North Road sa Barangay Canduman, Mandaue City ganinang kadlawn sa Nobiyembre 25, 2019.
Matod ni Police Corporal Rico Senilong nga nadawat nila ang report sa alas 3:40 sa kadlawn og daling miresponde ang kapulisan.
Base sa nakita sa CCTV footage sa Command Center sa Mandaue ang duha pareho og direksyon paingon sa Consolacion. Si Jude Yap, 46, minyo og maneho sa laing motorsiklo samtang si Regie Rosal, 39, minyo nagsunod sakay sa iyang motorsiklo gikatahong kusog kini nga nagpadagan hinungdan nga nagkabangga ang duha og naguroy paingon sa daplin sa kalsada.
“Pag-abot namo sa scene si Rosal gidala na sa ambulansya samtang si Yap naghigda sa dalan og nagpaabot og laing ambulansya,” sigon pa ni Senilong.
Ang duha naka-angkon og mga pangos-pangos ug bun-og samtang si Rosal giingong kritikal na ang kondisyon tungod sa grabeng nahi-aguman niini.
Pag-abot sa Mandaue City Hospital gideklarar si Rosal nga dead on arrival.
Gituohang na-ugbok ang ulo ni Rosal hinungdan sa iyang kamatayon sigon ni Senilong.
Si Yap gibalhin sa Mendero Medical Center aron magpa-alim sa iyang injuries ug naglisod sa paginhawa. Padayon pa ang imbestigasyon sa kapulisan kabahin niini nga insidente. (KFD)