MIUBOS na ang gidaghanon sa electronic cigarettes ug vapes ang nasakmit sa kapulisan sa Central Visayas human gihingusgan nila kini sukad mimando si President Rodrigo Duterte sa miaging semana.
Si P/Brig. Gen. Valeriano De Leon, direktor sa Police Regional Office (PRO) 7, nga bisan sa maong kalamboan, padayong sakmiton ang e-cigar ug vapes nga gamiton sa mga publikong lugar.
Mga hepe sa kalungsuran ug siyudad sa Rehiyon 7 gimandoan nga magbutang sila og pahibawo sa pagdili sa pag gamit niini sa publikong lugar o maibargo kini.
Apan, dason ni De Leon, miubos ang gidaghanon sa mga nasakmit nga vape gikan niadtong Nobiyembre 22, hangtod karon.
Tungod niini, nagtuo si De Leon nga nakasabot na ang mga tawo labot sa mando ni President Duterte nga hugot na nga gidili ang pag gamit sa vape sa bisan asa lang nga lugar.
Gipasabot sa PRO-7 director nga ang ilang gihimo sa pagkakaron mao lang ang pag sakmit sa e-cigarettes ug ibutang sa blotter apan ang tag-iya dili ra dakpon.
Sa kadtong magmagahi nga use/owner niini ug mosukol sa mga police mahimo sila nga dakpon base sa executive order gikan sa presidente.
Nakigtagbo na si De Leon sa mga naninda og e-cigarettes ug iya kining gipahimangnoan labot sa mando sa ilang labaw.
Tungod sa maong kalamboan, giawhag ni De Leon ang tanang city ug provincial police office directors nga magbutang og mga karatola pagpahibawo sa publiko nga gidili ang paggamit sa e-cigar sa bisan asang dapit.
Mahimo sila nga mogamit niini sa usa ka designated smoking area nga walay laing tawo nga maka hanggap sa aso gikan sa vape.
Gihangop usab niya ang pamahayag ni Konsehal Dave Tumulak nga ang konseho sa siyudad sa Sugbo nagplano nga modusog resolusyon pag-regulate sa paggamit sa vape sa dakbayan.
Sa pagkakaron, matod sa konsehal wala pay balaod nga magdili sa pag panigarilyo sa e-cigarettes gamit ang vape.
Apan kung adunay ordinansa ang siyudad mahimo nang dakpon ug pamultahon ang masakpan nga nanigarilyo sa mga publikong dapit. (AYB)