P5M hinabang sa mga nasunogan sa Mandaue

MOHATAG ang gobyerno sa dakbayan sa Mandaue og P5 milyon nga tabang pinansyal ngadto sa mga nabiktima sa sunog niadtong Nobiyembre 14, 2019 sa Barangay Casuntingan, dakbayan sa Mandaue.

Matod pa ni Vice-Mayor Glenn Bercede nga mohatag sila og P10,000 nga tabang pinansyal matag pamilya ngadto sa 83 homeowners samtang P5,000 alang sa 501 ka renters og niadtong partially burned houses.

Adunay gigahin nga P1,559,250 alang sa pagkaon sa mga nabiktima ug laing P100,750 alang sa miscellaneous, diin ang kinatibuk-an niini mokabat nadto sa P5 milyon.

Sigon ni Bercede nga wala pa sila magsabot kung kanus-a nila ipang-apod apod ang mga tabang pinansyal.

Giklaro sab niya nga ang mga donasyon mga gikan sa mga pribadong organisasyon wala pa malakip sa maong tabang kay ang P5 milyones gikan sa panudlanan sa gobyerno sa Mandaue.Naduso ang pagpanghatag og tabang pinansyal human nga mihatag si Maricel Yu, ang pangulo sa City Social Welfare and Services sa final disaster record sa maong insidente. (KFD)