PALPAK maoy miabli sa una pa lang ganing hut-ong ning pag-host sa nasod sa 30th Southeast Asian (SEA) Games.
Kini human nga wa maakatar sa mga organizer ang pag-abot sa mga football teams sa nasod sa Timor-Leste, Myanmar ug Cambodia.
Tiaw mo bay midagan pa og tulo ka oras ang pagpaabot sa Timor-Leste sa airport una pa sila makuha sa bus paingon sa ilang hotel.
Ang nakapasamot sa sitwasyon kay dili pa gyud mao ang hotel nga gihatdan sa maong team.
Sama sa Timor-Leste, ang Myanmar ug Cambodia nakasinati usab og grabing kadugay sa ilang pagpaabot sa service bus nga mokuha kanila.
Pag-abot sa hotel Wa usab dayon kini makasulod sa ilang tagsatagsa ka mga kuwarto kay naghuwat pa kini sa check-in time.
Sa niaging semana, dunay migawas nga article nga nagyagyag kalabot sa reklamo sa mga volunteers nga nakasinati usab og way klarong akomodasyon.
Bisan gani kuno sa ilang mga pagkaon, kinahanglan pang mogasto sa kaugalingong kuwarta.
Usa ang mibutyag nga wala pa gyud makompleto ang mga pasilidad sulod sa bag-ong stadium sa Clark City.
Wala pa usay signal ang maong dapit ug wa usab silay nadawat nga mga tagsa-tagsang assignments. Mao ni mga rason nganong naingon ato intawon ang paghiabot sa Timor-Leste, Myanmar ug Cambodia.
Reklamo usab sa Thailand ang kalangay sa pag-release sa ilang mga accreditation card hinungdan nga wala na lang sila makapahigayong og praktis.
Ug ang lain nilang reklamo mao ang pagkaon nga kuno nagbalik-balik ang menu.
Ang presidente sa Thailand Football Association nga si Gen. Somyot Poompanmuang nimando karon sa iyang mga sakop nga mohatag og dugang mga pagkaon ngadto sa ilang mga athletes ug coaches hangtod sa katapusang adlaw sa competition.
Ang Brunei wa usab mahimuot sa ilang gisakyan nga e-jeep nga naghatod kanila sa hotel tungod sa kagamay niini.
Wa usab makaipsot sa kahasol ang Philippine women’s football team Malditas kay wa usab maandam ang mga rooms nga maoy ilang puy-an. Gawas niini, taglima pa gyud ka mga players ang mo-okupar sa usa ka kuwarto imbis tagurha ra. Naunsa na man ni, oy.
Pipila pa lang gani ni ka pugyot sa mga nagkalainlaing delegasyon sa ubang nasod ang nahiabot, unsa pa kaha og modagsa na to ang tanan.
Bisan unsa pay irason sa organizer kalabot niini duha ra gyud ka butang ang mosantop sa hunahuna sa mga tawo.
Kuwang sa preparasyon o kaha way igong kasinatian ang nagpasiugda unsaon pag-organisar ang susama niining kalihukan.
Imbis ang pagpreparar maoy tutukan, nagugol na hinuon didto sa controversial issues sa corruption ug ang panaglantugi sa atong mga halangdong pulitiko ang mikawat sa atensiyon.
Mao ni linugdangan sa grabing pamulitika ug pangurakot sa nasod. Hinaot nga matabang pa ni kay kon dili usa kini ka international embarrasment sa Pilipinas.
Usa ka dakong katalagman sa atong pag-host og international sporting competition nga makagusbat sa imahe sa nasod nga lisod papason sa kasaysayan. (jun.migallen22@gmail.com)