ABI ninyo nga partido politikal no? Kini ang People's Development for Progress (PDP) Transport Service Cooperative. Pero tinuod nga gikan kini sa hugpong sa Partido Demokratiko Pilipino (PDP) nga gitukod kaniadto sa mga bantugang Mindanaonon sama nila ni Cesar Ledesma, Cris Lanorias, Rey Teves ug bag-o lang nipanaw nga si kanhi Senate President Aquilino "Nene" Pimentel.
Mao usab kini ang partido nga nisapnay ni Mayor Rody Duterte sa paglusad niya sa iyang kandidatura sa bugnong-lugaynon niadtong 2016. Human sa malampusong kampanya diin nikabat og P16 milyon ka Pilipino ang nipabor kang Duterte, wala nihunong ang maong grupo aron makahatag og serbisyo sa iyang gingsakpan.
Wala nila paabuta nga tunolan sila'g hinabang gikan sa gobyerno kay lagi ka partido nila ang presidente og nitabang sila sa iyang kandidatura. Kahibalo sila nga maputos sa trabaho ang presidente sa daghang problema sa katilingban nga bisan ang iyang kaugalingong pamilya makalimtan pa.
Naghambin usab og problema sa liderato ang PDP-Laban ilabi na dinhi sa rehiyon sa Davao busa gipili nila nga motindog sa kaugalingong tiil aron makatabang sa problema sa kapobrehon sa halos 2,000 ka sakop, kadaghanan kanila kabus nga mga jeepney operators ug drivers.
Sa dili madugay, ipahamtang na sa gobyerno ang balaod sa Transport Modernization diin ilisdan na'g aircon bus nga nigamit og "Euro 4-compliant" nga makina og lana tungod sa dakong isyu sa panglawas ug sa "climate crisis."
Ang aso nga gikan sa tambutso sa karaang sakyanan nakapadugang sa "carbon footprints" o uling nga niabot sa papunawpunawan nga nakabuslot sa "ozone layer" o dili makita nga mantil nga nitabon sa kalibutan nga nipugong sa direktang silaw sa adlaw.
Busa taliwala sa pagpugong sa pipila, gipadayon sa lideres sa Tugbok-Mintal Calinan chapter sa PDP nga tukuron ang usa ka "transport service cooperative."
Tuod man, human sa sobra duha ka tuig nga pakigbisog ug pakigharong sa daghang personalidad ug ahensiya sa gobyerno, nahatagan gayod sila og pagtugot sa Office of Transport Cooperative (OTC) sa Cooperative Development Authority nga makapahimulos sa mando sa balaod nga makaangkon og prangkisa nga maka-operate og mga modernong bus nga pampasahero sa tulo ka rehiyon sa Mindanao (Rehiyon 11, 12 ug 13) sa sunod tuig.
Posible pa silang mo-apply nga mo-operate sa rota nga Davao-Pasay City. Niadtong niaging semana, niabot na didto sa Manila ang 15 sa 30 ka unit sa bus nga ilang gi-order gikan sa China samtang moabot ang katunga sa Enero 2020 busa hataas kaayo ang ilang panglantaw nga makaapil sa maong programa sa gobyerno.
Atong nasayran nga nisaad si Mayor Sara Duterte-Carpio nga mopadagan og 1,000 ka mga bus pampasahero dinhi sa Davao pinaagi sa mga "transport service cooperative." Sa pagkakaron kini pa lang nga kooperatiba ang nahatagan og permit sa OTC sa Rehiyon 11.
Dalaygon ang gibuhat sa kooperatiba nga niapil sa programa sa gobyerno sa modernong tranportasyon og pag-organisa sa mga gagmay'ng operators ug drivers nga direktang maapektohan unya niini.
Apan mora'g way kisaw sa pag-organisa sa draybers dinhi? Unta suportahan sila sa lokal ug nasyunal nga gobyerno.