SHARIFF AGUAK, Maguindanao -- Grupo sa Bangsamoro Islamic Freedom Fighters (BIFF) ang gitudlo nga suspek sa pagpabusikad sa sakyanan sa kumander sa Moro Islamic Liberation Front (MILF) alas 10:50 sa buntag niadtong Dominggo, Nobyembre 24.
Gibutyag ni Maguindanao Police Provincial Office Director Arnold Santiago nga nibusikad ang improvised explosive device (IED) nga gibutang sa nakaparada nga motorsiklo daplin sa kalsada sa Mother Barangay Poblacion sa maong lungsod.
Giatol ang pagpabusikad niini sa pag-agi sa Toyota Hilux pick-up nga dunay plaka NEB 4056 ni Datu Item Ampatuan, base commander sa 106th Base Command sa MILF.
Natusak-tusak sa mga tipaka sa IED ang pick-up apan milagro nga wala maigo ang mga sakay niini nga sila Arsad Lintang, Jumer Mamasapano, Norodin Sansaluna, Johaimirin Sansaluna ug ang drayber nga si Jeanor Lintang, pulos mga miyembro sa MILF Task Force Itihad.
Giingon sa mga sakop sa Explosive Ordnance Disposal Team sa Philippine Army nga ang bomba dunay cellphone detonated nga gama sa BIFF, ubos sa Dawlah Islamiya terror group nga nalambigit sa pagpamomba sa nagkadaiyang dapit sa Central Mindanao.
Posibleng panimalos ang motibo sa pagpabusikad sa sakyanan gumikan sa pagtabang sa MILF sa militar sa paglutos sa BIFF-Isis-inspired group. (Edgar E. Fuerzas)