Ginang gipatay sa bisita

SunStar File
SunStar File

COMPOSTELA -- Gisusi sa kapulisan sa Compostela Municipal Police Station ang motibong nagpaluyo sa pagpatay sa usa ka ginang didto mismo sa iyang balay sa Purok 6, Barangay Poblacion alas 6:00 sa gabii, Dominggo, Nobyembre 24, 2019.

Giila ang ginang nga si Armie Angcot Bernardo, 33, minyo, molupyo sa nahigutang dapit.

Base sa imbestigasyon sa Compostela Municipal Police Station, nasayran nga anaa lang sulod sa balay ang biktima sa dihang niabot ang duha ka mga wa mailhing lalaki nga sakay sa motorsiklo.

Usa kanila nanaug sa motorsiklo ug sumala pa nangita sa biktima, hinungdan nga gitawag sa anak nga si Saint, 14 anyos, ang biktima nga iyang inahan.

Sa dihang nigawas na ang biktima, nadungog na lang sa anak nga gipangutana sa suspek ang biktima kung gusto ba kini nga motrabaho sa Sunshine Karton.

Apan bisan og wa pa makatubag ang biktima, mipaka na dayon ang sunod-sunod nga buto sa armas ug maoy nakit-an nga nahagba na sa yuta ang biktima ug naligo na sa kaugalingong dugo.

Samtang ang duha ka mga suspek nagdaling nangagiw sakay sa motorsiklo paingon sa wala masayring direksiyon.

Nasayran nga nakahiagom ang biktima og upat ka mga samad pinusilan sa nagkadaiyang bahin sa lawas nga niresulta sa hinanali niyang kamatayon.

Dugang gibutyag sa anak nga sa niaging mga adlaw, adunay nangita sa biktima apan wa kini hiabti sa balay.

Narekober gikan sa crime scene ang duha ka balinis sa bala sa wala matinong kalibre sa armas.

Nasayran nga ang pagpamusil nahitabo atol kasaulogan sa piyesta sa purok sa biktima.

Ang patay'ng lawas sa misis gihaya sa Alar Funeral Parlor sa Purok 2, Barangay Poblacion.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph