SUPERBALITA CEBU

‘Durugista’ gipatay, gilubong

(SunStar foto/ Benjie B. Talisic)

LAWAS sa lalakeng gituohang nalambigit sa illegal drugs nakuykoyan sa kapulisan sa gilubngan niini sa bung-aw sa Sityo Sambagan, Barangay Lagtang, Dakbayan sa Talisay, pasado alas 11 sa gabii sa Lunes, Nobiyembre 25, 2019.

Nasayran kini sa kapulisan pinaagi sa text ug duna say nitawag kang Talisay City Mayor Gerald Anthony Gullas Jr. ug gipasa sa Barangay Lagtang.

Matod ni Police Sergeant Alfredo Mandal sa Talisay City Police Station nga niresponde sa dapit, gitawgan sila ni Lagtang Barangay Captain Chester Salcedo human usab pahibaw-a ni Gullas.

Dugang pa ni Mandal nga pag-abot sa lugar, ilang gikabkaban ang yuta hangtud nga migimaw ang kamot sa lalaki nga gilubong sa yuta mga lima ngadto na sa walo ka tiil ang gilawmon.

Ang baho sa patay usa sa mga nakagiya.

Nagtuo si Mandal nga gibukbok ang ulo sa lalake og bug-at nga butang tungod kay di na mahitsura ang nawong.

Sa pagsuwat ning taho, wa pa mailhi sa kapulisan ang biktima.

Kini gibana-banang dunay gitas-on nga 5’5, lagom og pamanit samtang nakasuot kini og t-shirt nga dark blue nga dunay markang Tribal Street Wear.

Naka short pants kini sa pang-ubos nga sama og camouflage ug dunay arm band.

Sa paghiling sa Scene of the Crime Operatives (SOCO), dunay narekober nga usa ka kaha sa usa ka CD tape ug dunay sulod nga illegal drugs paraphernalia sama sa lighter, tin foil nga ginamit na ug mga putos sa shabu nga wa nay sud.

Gidugang usab ni Mandal nga ang maong lalake anaa na sa state of decomposition, buot pasabot nga lapas 24 oras na nga namatay.

“Dili na kaayo mailhan ang iyang hitsura ug baho baho na pud ang patay. Siguro anaa ni sa duha ngadto sa tulo ka adlaw,”pasabot ni Mandal.

Giangkon usab ni Mandal nga posibleng moagi sila og kalisud sa pag-ila sa mga killer ilabi na nga walay nakakita sa paglubong.

“Duna mi subayonon nga mga posibleng persons of interest. Naglaum mi nga makahatag ni og tabang sa pag ila sa mipatay sa maong tawo,” matod ni Mandal.

Ilang gitan-aw sa pagkakaron ang drugas nga motibo.

Si Salcedo nga nahinabi sa Superbalita Cebu niingon nga sa pagkadawat niini sa text gikan sa mayor, ila dayon kini nga gilihok. Matod pa sa kapitan nga text ug tawag ang nadawat sa mayor.

“Padulong na gale unta ko matulog apan, duna may gi text ang atong mayor mao na nga amo gyud gipangita hangtud nga akong mga tanod nakapanimaho og langsa nga baho sama sa patay nga mananap mao to nga gisubay ug mao nana siya nga ang kamot ang migimaw ana,” matod ni Salcedo.

Wa sila makaila niini.

Nahug sa lungag

Dalagita nga missing sulod sa kapin 18 ka oras napalgang patay sa ilawom sa atabay sa Barangay Tinubdan, lungsod sa Daanbantayan, amihanang Sugbo.

Ang biktima giila nga si Maria Kristina Sophia Rondina Mercader, 15, nagpuyo ra usab sa Proper Barangay Tinubdan.

Sa Martes sa buntag, ang Daanbayan police station nakadawat og tawag gikan sa mga residente sa Tinubdan nga adunay dalagita ang na missing hinungdan nga nagpatabang silag pangita niini.

Katapusan kini nga nakit-an alas 6:30 sa gabii niadtong Lunes, Nobiyembre 25, sa kilid sa tabay sa dihang nanglaba.

Tungod sa maong impormasyon nangayo na usab silag tabang sa Municipal Disaster Risk Reduction and Management Office ug rescue team sa Bureau of Fire Protection sa lungsod aron pangitaon kini.

Usa ka residente ang mitug-an nga ilang nakit-an si Maria Kristina nga nanghayhay sa iyang mga linabhan duol sa tabay nga wa matabuni.

Tuod man, ilang gisubay ang tabay ug didto ilang nakita ang cellular phone sa biktima lakip na ang iyang tsinelas.

Ila dayong gisulod ang lawom nga tabay ug didto sa ilawom napalgang patay ang biktima nga nakaangkon og kadaot sa iyang lawas alas 12 na sa udto Martes.

Gisuwayan pa nila pagdala sa Daanbantayan District Hospital ang biktima apan, gideklara kini ni Doctor Christine Irish Tulayan nga dead on arrival.

Ipaubos nila sa autopsy ang lawas aron pagsiguro kon wa bay foul play.

Apan usa sa mga duda sa kapulisan sigun sa ilang imbestigasyon nga wala makabantay ang dalagita sa lungag samtang nang hayhay sa iyang gilabhan.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph