HUMAN sa duha ka buwan nga training andam na makig-gubat ibabaw sa ring si former three-time champion, reigning WBO interim Bantamweight King ug challenger “Quadro Alas/Four Aces” John Riel Reponte Casimero aron ilugon ang WBO belt ni “Last Born” Zolani Tete.
Ang lumad nga taga Barangay Can-untog, Ormoc City, Leyte nga si Casimero, 30 anyos, 5’4 (28W-4L, 19KO) sakop sa Manny Pacquiao (MP) Promotions moasdang sa UK-based boxer apan lumad taga Eastern Cape, South Africa nga si Tete, 31, 5’9 adunay baraha nga (28W-3L, 21KO).
Kon nagtuo ta nga yanohon ra si Tete nga kontra nasayop ka sanglit gitawag kini sa kadaghanan nga Filipino executioner sanglit ika-6 si Casimero niya nga kontra.
Ang lima ka mga pinoy boxers nga misukol ni Tete walay nagmahay kay giharos sama sa kamunggay.
Gipukan niya sila si Rexon Flores (KO1), Eduard Penerio (KO1), Arthur Villanueva (UD), Jether Oliva (UD) ug Richard Garcia (UD).
Hinuon atol sa usa ka online interview sa Superbalita Cebu, si Casimero madasigon nga nanglantaw sa kahayag nga padulngan ning ilang panagbagat ni Tete.
“Maayo ang skills training namo sa Las Vegas Nevada sulod sa duha ka buwan uban nila ni coach Nonoy Neri, coach Lucas Sugar Ting Ariosa ug ni strength & conditioning coach Angel Guillermo “Memo” Heredia Hernandez,” asoy ni Casimero ning tigbalita.
Matod ni Casimero misuroy sila aron maka sparring ang mga Cuban ug Japanese boxers sa mga inilang training facilities sa Las Vegas sama sa Capetillo Boxing Gym, City Sports Gym ug sa Ismael Salas Gym.
Gawas nga naka sparring kaniadto ni Casimero ang iyang stablemate nga si Genesis Libranza ning bag-o naka sparring partners niya sila si former WBO Super Bantamweight King Jessie Magdaleno, Alex Capetillo ug mga kaubanan.
Mitug-an si Casimero nga over nalang siya’g tulo ka libras sa 118-lb limit lima ka adlaw sa wala pa ang away. Gikaon niya karong panahona ang isda, karne sa manok ug baka, itlog, prutas ug utanon.
Matod ni Casimero nga si Tete maayo kaayo ang iyang style, kalit siya mosulod, maayo manumbag unya modagan kalit padulong sa luyo, hinuon ila na kini nga gipangandaman ang tanan apan aduna siyay hangyo sa mga pinoy boxing fans.
“Sa akong mga fans please pray nga modaug ang Team Philippines, Team Quadro Alas ingon man mag-ampo ta sa Diyos kay atong dungog kini kon magmadaugon ta, Mabuhay ang Pilipinas” panapos ni Casimero.
Ang Casimero versus Tete maoy main event karong Nobyembre 30, 2019 Sabado sa Arena Birmingham, West Midlands, England, UK nga gidalit sa Queens Promotions diin isalida sa UK BT Sport TV.
Mikompleto sa Team Casimero sila si MP Promotions president Sean Gibbons uban sa kapikas nga si Valerie, anak nga si Brendan ug kaubanan. (Daniel Quindao Guden, US Correspondent)