SA IYANG ikaupat nga duwa ning season, nakapakita na sa iyang saktong labok si Carmelo Anthony sa dihang gilubong sa Portland Trail Blazers ang Chicago Bulls, 117-94, Lunes, Nobiyembre 26, sa National Basketball Association (NBA).
Si Anthony mikadlit og 25 puntos nga giayudahan usab sa 21 puntos ni CJ McCollum ug ni Damian Lillard nga mitali og 13 puntos ug 12 ka assists sa kadaugan nga nagputol sa ilang upat ka nagkutay nga kapildihan.
Lakip sa iyang napupo ang upat ka triples sa iyang pito ka itsa sa three-point area ug 10 usab sa 20 ka field goal attempt. Sa kinatibuk-an misumada na ngadto sa 15,615 puntos ang iyang natigom alang sa ika-18 nga luna sa scoring list sa NBA.
Nakapadasig sa 35-anyos kinsa gipapirma sa Portland og non-guaranteed nga kontrata niadtong Nobiyembre 19, mao ang siyagit usab sa iyang mga fans sa tungatungang bahin sa fourth quarter nga nagkanayon ,”We want Melo! We want Melo!
Ikasangka sa Portland ang Oklahoma City Thunder, kanhi team ni Anthony, karong Miyerkules sa gabii (Huwebes sa Pilipinas) diha sa ilang korte.
Samtang gipahugtan og maayo sa Los Angeles Lakers ang ilang paghupot sa liderato, 114-104, batok sa naghingutas nga San Antonio Spurs.
Si LeBron James misungkit og 33 puntos ug 13 ka assists alang sa Lakers kinsa misulbong na ngadto sa 15-2 nga baraha.
Double-double usab ang nahimo ni Anthony Davis nga may 17 puntos ug 12 ka rebounds sa kadaugan nga nagsayang sa 30 puntos ni LaMarcus Aldridges ug 22 puntos ni DeMar DeRozan sa Spurs.
Nakadawat usab og abiba gikan sa iyang mga dumadapig nga nipalagnog og MVP! MVP!, gipakita ni James ang lihok sa usa ka beteranong superstar.
Apan ang mikawat og atensiyon kagahapon mao ang 50 puntos ug 14 ka rebounds nga napupo ni Giannis Antetokounmpo sa kadaugan sa Milwaukee Bucks batok sa Utah Jazz, 122-118.
Kini maoy ika-17 nga sunodsunod nga double-double sa kasamtangan MVP awardee.
Samtang gituboy ni Chris Paul ang Oklahoma City Thunder ngadto sa 100-97 nga kadaugan batok sa Golden State Warriors pinaagi sa iyang 19-footer nga jumpshot sa katapusang 36 segundos sa duwa.
Ang Warriors maoy permi naglabaw apan wa kini makalahutay human mipahagsa og 13-0 nga rally ang Thunder sa himatyong segundos.
Sa ubang resulta, gipatapsingan sa Nets ang Cavaliers, 108-106, gibaraw sa Pistons ang Magic, 103-88 ug gikitkit sa Timberwolves ang Hawks, 125-113.
Nakaipsot usab ang Boston sa mga kamot sa Kings, 103-102, samtang gipainitan sa Miami ang Hornets, 117-100. Nadominar sa Raptors ang Sixers, 101-96. (JBM)