TACLOBAN City- Usa ka Chinese national nadakpan sa kapulisan gumikan sa ilegal nga pag-refill og liquid petroleum gas (LPG).
Ang nasikop mao si Rong Chang Xu, 36, minyo, tag-iya sa XML Wholesale and Retail, nagpuyo sa 212 Salazar st., Barangay 19 ning siyudad.
Lakip sa nasikop ang helper nga si Virgil Flores Cabugwang, 25, taga Burgos st., Barangay 20.
Nangulo sa pagsikop mao ang Criminal Investigation and Detection Group - Regional Field Office 8 pinangulohan ni Police Lieutenant Reynante Panay.
Kauban sa CIDG ang taga Department of Energy (DOE).
Daghan na og nadawat nga report ang kapulisan sa ilegal nga kalihukan ni Xu, kinsa usa ka bigtime nga supplier sa butane.
Pasado ala 1 sa hapon, Lunes, Nobiyembre 25, 2019, usa ka pulis ang nagpakaron ingnon nga buyer.Nakapalit ang pulis og tulo ka butane canisters nga dunay sulod nga LPG gamit ang P100 nga marked money. Human sa transaksyon, gisikop ang duha ka mga suspek.
Base sa inventory, gawas sa tulo ka mga butane canister nga subject sa buy-bust, nakuha usab ang 46 ka mga kahon nga matag usa dunay sud nga 24 ka butane canisters. (JKDP)