ABUYOG, Leyte -Kapitan sa usa ka barangay ning lungsod nasikop sa anti illegal drugs operation sa kapulisan.
Ang buy-bust operation gihimo pasado alas 8 sa buntag, Sabado, Nobiyembre 23, 2019 sa Barangay Bito. Giila ang suspek nga si Beinvinido Tijano Lozada Jr., 43, kapitan sa Barangay Bahay ning lungsod.
Si Lozada naa sa listahan sa Leyte Police Provincial Office (LPPO) isip high value target gumikan sa ilegal nga kalihukan.
Ang kapulisan sa LPPO-Drug Enforcement Unit pinangulohan ni Police Captain Luis Hatton ug Abuyog Police pinangulohan ni Police Captain Antonio Angcay ang nagtinabangay sa operasyon.
Nasikop ang kapitan human mapaliti og usa ka pakete sa gituohang shabu sa usa ka poseur buyer.
Dali nga gipalibutan sa mga pulis ang suspek ug nakuha sa pagrekisa ang laing lima pa ka mga pakete sa gituhoang shabu.
Duna usay salapi lakip ang marked money ug cellphone.
Naa na sa kustodiya sa Abuyog PNP si Lozada ug gipasakaan na og kasong kalapasan sa Republic Act 9165 kun Comprehensive Dangerous Drugs Act of 2002.