KAPULISAN sa Central Visayas misugyot sa Sinulog Foundation nga wala lang unyay concert party usa ka adlaw sa dili pa ang dagkong kalihukan sa Sinulog sama sa fluvial ug solemn procession, aron dili mahago ang mga police nga mobantay sa seguridad.
Matod ni Police Colonel Geovanie Maines nga ang iyang gipasabot mao ang kalihukan sa Fuente Osmeña diin adunay himuon nga concert party nianang Biyernes sa gabii nga maabtan og kaadlawon.
Dugang niya nga adunay daghang police ang gipabantay sa Fuente circle aron mahatagan lang og siguridad ang mga tawo nga mosaksi sa maong kalihukan.
Gusto niya nga sa Sabado ug Domingo nga mao ang mga adlaw nga adunay dagkong kalihukan sa Sinulog aron nga makapahuway ang kapulisan sa pagbantay.
Atol sa coordinating conference nga gihimo sa Sinulog Foundation, kapulisan, militar ug ubang ahensya sa gobyerno gihikyad sa simbahan ang mga kalingawan sa dili pa ang adlaw sa Sinulog.
“Imagine that we will be having a street parties of 10 in the evening onwards and the following day, ay big day. Halimbawa yung solemn procession eh mahirapan ang mga tao natin yan kung magdamag mong binabantayan yung party nayan tapos the following day may malaking event,” matod ni Maines sa mga tigbalita.
Gani sa unang adlaw pa lang sa Disyembre aduna nay kalingawan ang Fuente Osmeña circle nga hatagan na usab og igong siguridad sa kapulisan.
Nakaandam na hinuon kini matod ni Colonel Maines diin adunay augmentation sa police regional office 7 alang sa mga kalihukan sa panahon sa pasko.
Lakip sa ilang gipangandaman ang motumaw unya nga problema sa trapiko sa tibuok siyudad atol sa pagsugod sa mga kalingawan sa Fuente Osmeña karong unang adlaw sa Disyembre. (AYB)