GITUG-AN sa kapulisan nga usa sa ilang gi-ila nga drug-infested ang Sityo Mananga, Barangay Tabunok, Talisay City hinungdan nga subsob nga operasyon ang gihimo.
Gitumbok nga high value target ang gihulagway nga tapokanan sa Sityo Mananga 2, ang nakaipsot sa dihang itunol na unta ang search warrant niadtong Lunes, Nobiyembre 25, 2019. Ang nakasibat giilanga si Gerry Aleser, hingkod ang panuigon, molupyo sa maong dapit.
Nagtuo ang Talisay Police nga nakamatngon ang suspek sa ilang presensiya, hinungdan nga nakasibat apan nahibilin niini ang mga pinakete sa shabu.
Sa gihimo nga pagsusi sa panimay sa suspek, nakuha ang duha ka medium pack ug walo ka gagmay nga mga pinakete sa gidudahan nga shabu. Nitimbang kini og 11 gramos ug mokantidad sa dul-an P70,000.
Atol sa pag-search, anaa ang presensya sa mga opisyal sa barangay nga sila si konsehal Chalmer Lastimosa ug Vicente Rabaya.
Gitug-an sa kapulisan nga bisan paman nga naka-eskapo ang HVT target nga si Aleser, pasakaan gihapon kini og kaso karong adlawa. (FMD)