DI NAKO aktibo sa social media ilabi na sa Facebook tungod kay okupado kaayo kami sa accreditation sa unibersidad nga akong gialagaran.
Sanglit wa na akoy panahon, di na ko updated sa mga komento sa mga netizens sa social media.
Apan dihang misuway ko pagsusi sa akong Facebook kagahapon, akong nakita nga gilat-an si Raffy Tulfo sa mga netizens nga misimpatiya sa magtutudlo nga gireklamo sa apohan sa bata nga giingon nga iyang giabuso.
Ug ang labaw nga gipistahan karon sa social media ang pagsaway sa palpak nga preparasyon sa 30th Southeast Asian Games.
Kinsa ang angay nga manubag sa palpak nga preparasyon? Siyempre, ang Philippine Southeast Asian Games Organizing Committee (PHISGOC) nga gitahasan sa pag-organisa sa prestihiyusong akbitidad.
Usa sa mga nakasaway mao si Singapore's chef de mission Juliana Seow kinsa nag-awhag sa Pilipinas nga molihok dayon sa mga kakulangan nga makabalda sa perpormans sa ilang mga atleta.
Sa iyang suwat nga gimantala sa The Strait Times sa Singapore niadtong Lunes, gitawagan ni Seow ang atensyon sa organizing committee labot sa koordinasyon sa transportasyon, akreditasyon, ug pagkaon.
"We request for your urgent and immediate attention to these matters. While we try our best to be patient and understanding, we cannot make any compromise when our athletes are affected directly," suma ni Seow ngadto kang PHISGOC chief operating officer Ramon Suzara niadtong Dominggo, Nobyembre 24.
Di lang kini ang nakita nga kakulangan kondi apil na usab ang mga venue diin himuon ang nagkadaiyang kompetisyon.
Sama sa team sa Timor Leste, Myanmar, Thailand, ug Cambodia, ang mga magduduwa sa Singapore nakasinati usab og problema sa pagtugpa pa lang nila sa Pilipinas.
Hinuon, akong nasabtan nga ang kalisdanan sa mga teams nahitabo tungod kay ang SEA Games officials gikuwestiyon sa Kongreso tungod sa bongga nga gasto.
Mao na nga nakapangutana ang uban, asa na ang gipanghambog nga kompleto na ang tanan?
Nasayud man unta sila nga dunay nagsingabot nga dakong aktibidad, nganong alanganin man kaayo ang ilang preparasyon?
Busa, ang nahitabo karon, dakong kaulawan di lang sa atong mga opisyales sa gobyerno, apan kanatong mga Pilipino.