PATAY na nga niabot sa tambalanan ang usa ka 21-anyos nga ulitawo human gitigbas sa 78-anyos nga lolo sulod mismo simbahan sa Jesus Miracle Crusade Ministry sa Purok 1, Barangay Sisimon alas 8:00 sa buntag, Lunes, Nobyembre 25.
Ang biktima giila nga mao si Dennis Gubaton Nudalo ug molupyo sa Purok 4, Brgy. Sisimon, Laak, Compostela Valley Province.
Subay sa report sa kapulisan, nasayran nga tua sa sulod sa maong simbahan ang biktima samtang naghimo sa iyang trabaho isip miyembro sa choir.
Wa madugay, giingong niabot ang suspek nga si Macario Burdios Tano, minyo, mag-uuma nga taga Purok 2, Brgy. Sisimon ug way daghang istorya, diretso niining gihapsan ug giluba ang biktima tumong sa nagkadaiyang bahin sa lawas.
Nakahiagom ang biktima og mga samad tinigbasan ug dinunggaban sa lawas ug gidali paghatud sa mga kaparyentihan ngadto sa ComVal Provincial Hospital sa Laak sa tinguha nga masalbar pa ang iyang kinabuhi.
Apan gideklara siyang dead on arrival sa naghiling nga doktor.
Hinuon, dali sab nga nadakpan ang suspek nga lolo sa mga niresponding mga opisyal ug tanod sa barangay ug gitunol ngadto sa Laak Municipal Police Station, uban sa nakumpiskang sundang ug .38 revolver nga dunay unom ka mga buhing bala nga giingong gilabay niini sa kasilyas nga bahin sa lugar apan nakit-an gihapon pinaagi sa pagpanguna ni Barangay Kapitan Edgar Labustro Ybanez.