GIPANGHINGUSGAN sa lokal nga kagamhanan sa siyudad sa Cagayan de Oro nga mahatagan og pagtagad ang kaso sa mental health ilabi na nga ubay-ubay na ka kaso sa gitoohang paghikog ang nahitabo sa dakbayan.
Buot sa siyudad nga magmugna og hotline kalabot na niini apan sa kasamtangan bukas ang 911 alang sa nanginahanglan.
Ang labing ulahing kaso sa paghikog nahitabo niadtong Nobyimbre 26 diin napalgang naghikot sa liog gamit ang pisi si Paul Oliver (bansagon gitago), 32, sa Zone-9, Cugman ning siyudad.
Gikabutyag nga nisulay na sa pagpakamatay sa ikaupat kahigayon tungod na usab sa depresiyon ilabi na nga dili madawat ang pagbiya sa iyang asawa ug gani duna kini gibilin nga suicidal note.
Giangkon usab niini diha sa iyang suicidal note nga nakasala kini sa iyang asawa kinsa gikan sa gawas sa nasud.
Atol sa sesyon sa konseho sa siyudad gipadangat ni Konsehal Edna Dahino kalabot na sa ubay-ubay na nga kasong pagpakamatay ug kinahanglan nga hatagan og dakong pagtagad.
Samtang gibutyag ni Konsehal Suzette Magtajas-Daba, nga gilusad ning tuig ang hugot nga kampanya sa mental health awareness ug nagplano ang siyudad nga magbutang og hotline aron maoy matawagan kung dunay magkinahanglan og tabang ilabi na sa mga nakasinati og depresiyon.
"As of now I think this year nag start ang atong campaign for mental health awareness, the City is planning to have a hotline for that, for those who have suicidal tendencies but as of now we only have the 911 for those who are depress," matud ni Daba.
Samtang sa pakighinabi kang Konsehal Ma. Lourdes Gaane, tsirman sa komitiba sa panglawas gibutuag niini nga dako kaayo ang papel sa City Social Welfare and Development (CSWD) ilabi na nga nagkinahanglan ang mga nakasinati og depresiyon og "counseling" ug kinahanglan lang usab ang pagtinabangay.
"Dako kaayo og role ang atong CSWD, as far as mental health is concerned kailangan gyud ni siya magtinabangay gyud," matud ni Gaane.
Gi-aghat usab niini ang mga naghambing og mga problema ilabi na depresiyon nga motawag sa 911 aron nga matabangan.
"Pwedi sila motawag sa 911, naay mo entertain nila," dugang pa.
Nasayran nga ubay-ubay na ang mga kasong nagpakamatay dinhi sa siyudad.