GITUOHAN nga panagribal sa gugma sa usa ka babaye ang motibo sa pagpusil patay sa usa ka lalakeng taga Barangay Duljo Fatima, Dakbayan sa Sugbo.
Unsay gibasehan sa mga kabanay ni Niño Salmeron Aguilar, 29, nakaingon silang ribal sa babaye ang hinungdan?
Niadtong Dominggo sa gabii, sila si Aguilar ug usa ka alyas Gil nagpinusilay kay nag-away labot sa usa ka babaye.
Si Gil gikatahong natapsingan sa tiyan apan, ang hitabo wa mataho ngadto sa kapulisan.
Ang duha giingong managhigala kanhi.
Si Arnulfo Barazon, tanod sa Barangay Duljo Fatima, nagpuyo sa may dan B. Aranas, dihang nahinabi sa Superbalita Cebu, niingon nga nagkapinusilay niadtong Dominggo sa gabii sila si Aguilar ug Gil.
Apan wa mapahibawo ang kapulisan. Sila sa barangay napahibawo na buntag sa Lunes hinungdan nga wa maalarmahi.
Gihulagway ni Barazon nga susamag salida sa telebisyon ang hitabo.
“Ilang gilalisan kadto man daw uyab aning namatay nga matod pa hinigugma pud diay sa lalake,” nagkanayon si Barazon.
Samtang si Police Msgt. Nicolo Gonzales sa Mambaling Police, kinsa maoy naghawid sa kaso, nibutyag nga nagbinugtong ang usa ka lalake nga nagmotorsiklo mipusil kang Aguilar.
Nihunong kini tungod sa biktima dayong pusil sa makadahang mga higayon nga miresulta sa iyang kamatayon.
Dugang ni Gonzales nga base usab sa pamahayag sa inahan niini, ang higala ni Aguilar maoy nakaaway sa iyang anak.
Bisan niini, wa nila gisalikway nga dunay laing motibo sa pagpatay kay nalambigit usab si Aguilar sa illegal drugs.
Nasayran sa Superbalita Cebu nga pipila pa lang ka adlaw sukad nakagawas si Aguilar sa bilanggoan tungod sa kaso sa illegal drugs apan, nakaapiyansa.
Sa crime scene, narekober ang usa ka .38 kalibreng revolver gikan sa tuong bulsa sa shortpants sa biktima.
“Sa akong pag tan-aw ang biktima wala nakapabuto kay wala man tay nakita nga kabhang sa bala gikan sa armas nga gihuptan niini,” dugang ni Gonzales.
Gisugo og napkin
Giingong igo lang gisugo og napkin, lalakeng nagpaingon sa usa ka tindahan sa sityo Riles, Barangay Hipodromo ning dakbayan, gipusil patay sa wa pa mailhing gunman Martes sa gabii, Nobiyembre 26.
Ang biktima giilang si Erwin Vestil, 42, lumad nga taga Villa Leyson Subdivision, Barangay Bacayan ning siyudad apan, nagpuyo sa balay sa iyang ginikanan sa Sityo Riles, Barangay Hipodromo.
Si Police Master Sergeant Antonio Din sa Mabolo Police, kinsa maoy naghawid sa kaso, niingon nga sa wa pa pusila si Vestil, dunay gikalalis nga tawo nianang adlawan pa.
Mao kini ang ilang susihon kon kinsa ug duna bay kalambigitan sa pagpamusil.
Si Vestil nakaangkon og mga samad pinusilan sa lawas gikan sa kalibre .45 nga pistola.