KAPIN P1.2 million nga balor sa ginadiling drogas ang nasakmit ug upat ka gidudahang durugista ang nasikop sa mga kapulisan sa managlahing operasyon sa dakbayan sa Sugbo niadtong Martes sa gabii, Nobyembre 26, 2019.
Nasikop sa mga sakop sa City Drug Enforcement Unit sa Cebu City Police Office (CCPO) si Leo Labador, 36 anyos, pinaagi sa usa ka buy-bust operation sulod sa iyang balay sa Concepcion St., Barangay Suba mga pasado alas 7 sa gabii, adlawng Martes.
Nakuha gikan ni Labador ang duha ka medium pack ug usa ka gagmayng pakete nga gidudahang shabu nga moabot sa 150 gramos og moabot ang kantidad sa P1 million.
Mga pila ka oras lang ang nilabay, laing duha ka gidudahang tigpayuhot ug ginadiling drogas ang nasikop sa mga operatiba sa Cebu City Intelligence Branch sa CCPO sa Sitio Avocado, Barangay Mambaling, sa maong dakbayan.
Nasikop sila Renante Matas, 36 anyos; ug Jay Rama Abella, 36 anyos, pulos molopyo sa maong dapit.
Nasakmit kanila ang moabot na sa P221,000 nga balor sa shabu.
Samtang, usa ka 36-anyos nga gidudahang durugista ang nasikop sa Sitio San Judas, Barangay Tinago, sa maong dakbayan mga pila ka minutos ang nilabay.
Nasikop sa mga sakop sa Waterfront Police Station si Edwin Duarte, 36 anyos, residente sa maong dapit, atol sa usa ka buy-bust operation.
Nakuha gikan ni Duarte ang mga pakete sa gidudahang shabu nga mobalor og P54,000. (Superbalita Cebu)