KANHI kapitan sa Barangay Kamputhaw mipasaka ug kasong libelo atubangan sa Cebu City Prosecutor's Office kaganihang buntag, Nobyembre 27, 2019, batok sa tulo ka mga kawani sa Cebu City Hall nga nipasaka ug reklamong sexual harassment batok kaniya.
Nipasaka ug kaso si kanhi Department of General Services (DGS) division head Lorenzo Basamot batok sa tulo sa pasangil nga gihugawhugaw ang iyang pangalan, ilabi na nga nakahatag ug dakong epekto kaniya ug sa iyang pamilya.
Ang tulo ka babaye pulos kawani sa City Hall.
Matud pa ni Basamot nga nakahukom siya sa pag sang-at ug kaso human nga dili siya mahimutang sa kaugalingon.
"Dili ko makatulog ug tarong. Nauwaw akong pamilya," sigon ni Basamot.
Dugang pa ni Basamot nga walay kamatuoran ang tanang mga isyu nga gipangbato kaniya.
Gidepensahan usab ni Basamot si Konsehal Niña Mabatid nga mao karon ang chairman sa Women and Children's Committee sa Cebu City Council nga walay labot sa kini nga kaso.
Nakadawat anonymously ang SunStar Cebu og managlahing notarized affidavit sa maong tulo ka empleyado kun diin ilang gipasangil nga gi- sexually harassed sila ni Basamot.
Sa mga niagi nga interbyu, si Basamot miingon nga sa tulo ka mga complainant, usa ra ang iyang nailhan ug matud niya, wa siya’y interaction sa laing duha.
Ang isyu nagsugod niadto Nobyembre 5, 2019, kun diin nagpahigayon og tree-planting activity ang City Hall.
Matud ni Basamot nga nagkasinabot siya sa iyang mga kauban nga mag-inom ug karaoke sila paghuman sa maong kalihukan, kuyog na niadto ang usa sa mga complainant.
Niingon si Basamot nga padung na unta siya mouli kay di na siya mouban sa karaoke pero giduol siya sa usa ka complainant ug nihangyo mga magpapalit kini og cake kay birthday niya.
Niangkon si Basamot nga nihangyo siya sa babae kung pwede siya mubeso pero wala mosugot ang babae ug wa nalang sab namugos si Basamot.
Si Basamot miingon nga wa ang laing duha ka reklamo kay wa na siya kahibaw kun asa gikan tungod kay wa siya’y interaction kanila. (JJL/BBT)