POSITIBONG nakig-alayon sa mga miyembro sa lawless Moro Islamic Liberation Front group (LMG) ang mga ginsakpan ni Kanor Ampatuan nga maoy gitudlong nangulo sa Special Civilian Volunteer Organization (CVO) ug Citizen Armed Forces Geographical Unit (Cafgu) sa Maguindanao.

Kini gikumpirma ni 6th Infantry Division Philippine Army Chief Major General Anthony Alcantara.

Niya, nakadawat sila og impormasyon nga anaa nagtagu-tago sud sa Liguasan Marsh ang grupo ni Kanor Ampatuan, protektado kini sa mga sakop ni Kumander Ameril Umbra Kato sa 105th Base Command.

Nagplano sab si Ampatuan uban ang LMG nga molusad og katag-katag nga pagpangatake sa dili pa moabot ang piliay, ilabi na og di pa magawas gikan sa bilangguan sila kanhi Autonomous Region in Muslim Mindanao Governor Datu Zaldy Ampatuan ug Maguindanao Governor Datu Andal Ampatuan.

Gidugang sa taho nga nakadawat og dakong pundo ang usa ka opisyal sa LMG aron gubuton pag-usab ang probinsiya, aron dili mahinayon ang Mayo 10 nga eleksiyon.

Sumala pa nga may mga tag-as nga matang sa armas ug mga bala ang gihatag sa mga rebelde bugti sa kagawasan ug proteksyon sa grupo ni Kanor Ampatuan.

Giangkon ni Moro Islamic Liberation Front (MILF) Civil Military Relation Chief Eid Kabalu nga dunay mga special CVO ug Cafgu ang nagpahipi sa poder sa ilang mga paryente nga sakop sa MILF.

Batbat niya mihimo na og lakang ang ilang liderato nga kini sikopon ug i-surender sa GRP/MILF Panel.

Gipamahayag ni Maguindanao Police Provincial Director SSupt Alex Linesses, nga posibleng mo-ulbo ang kagubot sa Maguindanao kon sudlon sa militar ang gitaguan ni Kanor Ampatuan.

Hinungdan nga gihangyo nila ang MILF nga molihok dayon aron dakpon kining mga armado nga gilambigit sa milabay nga masaker didto sa sitio Masalay, barangay Salman, Ampatuan nga mikalas og 62 ka kinabuhi, apil na ang 32 ka mga lokal media sa Central Mindanao.

Gipasalig ni Linesses nga kontrolado nila karon ang sitwasyon sa Maguindanao, uban sa tabang sa militar nga maoy nagbantay sa seguridad sa katawhan.

Apan pabilin silang alerto gumikan sa hulgang pagpamomba ug pagpangatake sa mga rebelde. (Edgardo Fuerzas)