KAY di man gyud ta magkasabot, Ma, maayo pa molayas na lang ka!” matod ni Brando ngadto sa iyang ugangan nga si Marita nga dugay nang na-biyuda. Gipanulod na niya ang mga sinina sa iyang ugangan sa dakong bag. Iya kining gitunol kang Marita. Ania sila sa sala sa balay nga nahimutang sa baryo Bagalay ning dakbayan. Nasuko si Brando nga wa labhi ni Marita ang iyang mga brip ug pantalon tungod sa pagsupak ni Marly, kapikas ni Brando.
“Ka wa gud nimoy uwaw nga manghingilin nako! Unsa, imo ning balay nga akong gipuy-an?” Nahasinta si Marita ug nataas ang iyang tingog samtang naglingkod sa sopa.
“Tag-iya man pod ko ani! Bana god ko sa imong anak! Conjugal property namo ni, kay napalit ning balaya sulod sa among kaminyuon!” mapasigarbuhong pulong ni Brando.
Ang ugangan ug ang umagad lang ang nag-abot ning sayong kahapunon sa adlawng Sabado. Nag-relaks-rekaks unta si Marita nga nagtan-aw sa TV kay siya rang usa. Nanglakaw si Marly ug ang iyang anak nga si Nancy nga utso anyos. Mamalit sila og mga gamit sa eskuylahan nga nalista sa assignment ni Nancy. Unya takulahaw lang nga miabot si Brando ug malagutong nanghiling sa iyang lawak, sa mga labhanan ug linabhan.
Wa na may maayong relasyon sila si Brando ug Nancy. Iyahay na lang silag lakaw. Si Brando, teller sa banko, molakaw rag iya ug mouli sa ilang balay sa adlaw nga iyang gusto. Mao sab si Marly, receptionist sa usa ka five-star hotel. Dugay nang nakaamgo si Marly nga ang iyang bana walay natampo sa gastuhan sa ilang panimalay. Ang natampo ra ni Brando mao ang pagdulog niini kaniya sa katre. Ug wa nay lain.
Sa ilang balay ug yuta, si Marly ang mibayad sa downpayment ug maoy nagdata sa binulan nga bayranan. Sa ilang konsumo sa inadlawng pagkaon, si Marly gihapon ang naggasto. Sa binulang bayranan sa tubig, telepuno ug kuryente, si Marly gihapon ang nagkargo. Si Marly gihapon ang nagbayad sa twisyon sa eskuylahan ni Nancy.
“Sa pagka tinuod, malipay ko nga mahilayo ning inyong panimalay! Aron makapahuway ko! Kay ako god inyong kusinera, labandera, yaya ni Nancy o all-round-maid! Unya, way suweldo. Busa kon molayas ko, makakaplag kaha kag meyd ug yaya ni Nancy? Naluoy lang ko sa akong apo. Maong miagwanta kog trabaho kaninyo isip meyd nga way sweldo-sweldo!” batbat ni Marita.
Wa makatingog si Brando nga nanglipaghong.
“Maghuwat lang kong Marly. Kon si Marly ang mohingilin nako kay siya may giila nakong tag-iya sa balay, mopahawa ko!” ni Marita.
Unya, kalit nga naabli ang pultahan sa balay. Migangha si Marly nga namula ang nawong.
“Unsa, Ma? Gihinginlan ka ning kagwang dako? Ka wa gyud niyay uwaw! Uy, uy, uy! Ikaw, Brando, ang angay mopahawa karon dayon! Wa kay pulos nga pagka bana! Bana ka lang sa katre! Wa kay bisan peso naamot sa atong pamuyo!” singgaak ni Marly. Gitulisok niya ang iyang bana. Taudtaod na diay silang Nancy nga miabot. Naghinayhinay lang siyag duol sa balay nga wa himatikdi nilang Marita ug Brando samtang sila naglalis. Nagpahipi lang siya sa pultahan.
Naminghoy ang nawong ni Brando. Nanglipaghong siyang misulod sa ilang lawak ni Marly aron manghipos sa iyang mga sapot ug ubang mga gamit. (Katapusan)