SUPERBALITA DAVAO

Delos Reyes: P50-M nga kawa sa SEA Games (Ikaduha ug katapusang gula)

Yanong Pagsabot

GARBO sa atong nasud mga kita ang host sa SEA Games karong tuiga, usa ka paugnat sa kusog nga ginaapilan sa dul-an 10,000 ka mga atleta sa mga nasud sa Southeast Asia.

Garbo sa Pinoy nga mapakita nato ang pagkamatinagdanon, pagkamaabi-abihon sa atong mga bisita. Sa kahimtang sa mga nagpuyo sa bukid ihawan dayon og manok aron ipakaon, lahi kay sa ordinaryo nga mga adlaw nga bulad ug ginamos lang.

Kuhaon ang inarmirolan nga habol nga dugay na gitagoan sa kaban panahon sa gabii kay mao na ang atong nabatasan. Ang pagpakanaa luyo sa kalisud aron lang masilbihan ug malipay ang bisita sa atong balay.

Alang sa maong paugnat sa kusog, migasto og dako nga kantidad ang atong nasud aron pagtukod og mga pasilidad didto sa Clark City Athletic Stadium sa, Capaz, Tarlac, gamay lang ang dula nga himoon didto.

Apil karon sa ginapaimbistigahan ni Drilon ang paghimo sa kawa nga magsilbi nga torch sa SEA Games nga gigastuhan og P50 Million. Ang torch dunay 3 ka metros ang kalapdon ug 50 metros ang katas-on nga pasigahon sa 11 ka adlaw lang.

Ang P50 million nga bayad nagalangkob niining mosunod: Design 4.4 , Foundation, 30.4 samtang ang construction P32 million.

Si Francisco "Boboy" Manosa, usa ka National artist for Architecture, maoy nagdesinyo.

May punto si Drilon kay 50 ka classroom na kuno nga eskwelahan ang mahimo sa mao nga kantidad kon itukod kini og gambalay labi nga nga kulang ang mga eskwelahan sa nasud.

Nakalimot lang si Drilon nga SEA Games kini nga kalihukan dili sama sa DCAA (Davao City Athletic Association) o Davraa (Davao Region Athletic Association) nga pwede ra patindogan og kawayan basta magsiga atol sa aktibidad.

Usa pa, garbo sa atong nasud ang nakataya ining panahona sa maong katikaran. Ato sab hinumdoman nga unsa man ang makita sa mga atleta ug mga bisita sa ilang pag-apil sa Sea Games, ila kana nga balonon sa ilang pag pauli ug mamahimong ilang ipanugilon sa katawhan sa ilang dapit.

Maayo man o dautan, magpaabot ta unsay linugdangan inig kahuman sa Sea games. Manghinaut sab ta sa kadaugan sa atong mga atleta kay ang resulta sa mga medalya nga ilang mahakot magadetermina kon unsa ang ilang pagpangandam.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph