MOKANTIDAD og P300 mil ang street value sa gituohang shabu nga nasakmit sa kapulisan sa Toril Police Station atol sa drug bust didto sa B16 L4, Rosalina Village 1, Barangay Bago Gallera, Puan, Davao City.
Ang mga suspek giila sa Toril Philippine National Police(PNP) nga sila si Ryan Piyao "Ryan" Atamosa, 36anyos, minyo, ug Ariel Villarojo Tanocan, 31anyos. Ang duha pulos nagpuyo sa Barangay Bago Gallera ning siyudad.
Nakumpiska gikan sa mga dinakpan mao ang 39 ka pakite sa gituohang shabu, marked money, ug mga drug paraphernalia.
Sumala sa kapulisan sa Toril PNP nga nakadawat sila og impormasyon labot sa ilegal nga transaksyon sa mga dinakpan.
Dihang nag-positibo nga mobaligya og shabu ang mga suspek, gilusad dayon ang operasyon hinungdan nga nasikop ang duha.
Kasong pagsupak sa Republic Act 9165 kun Comprehensive Dangerous Drug Act of 2002 ang atubangon nga kaso sa mga dinakpan didto sa korte. (Jeepy P. Compio)