TUNGOD sa naghugop nga tourist arrival sa Island Garden City of Samal (Igacos), tinguha sa Police Regional Office (PRO)-Davao ang pagmugna og tourist police aron maseguro nga luwas ang mga moadto sa dagat sa isla.
Si PRO Regional Director Police Brigadier General Filmore Escobal nagsulti atoll sa press forum kagahapon nga ang lokal nga kagamhanan sa Igacos nihangyo sa ilang buhatan alang sa dugang puwersa sa pulis aron mobantay sa isla isip pangandam alang sa nagkadaghang ihap sa mga turista.
Gibutyag ni Escobal nga sayo niini niadto siya sa national headquarter aron nga hisgutan ang subling pabalik sa tourist police sa Samal Island.
Matud niya nga iya nang gipalihok og balik ang yunit apan naa pa sa interim status.
Naa na sila karon sa proseso sa pagbutang og mga gikinahanglan nga ihap sa personahe aron nga makompleto ang bag-ong yunit nga ipailawomsa provincial police.
"I was already provided with the guidance that I can already activate it although interim na muna kasi it will require a longer process, ang required na approval ng Napolcom but I can already implement that," tug-an niya.
Puntirya niya nga permanente nang molihok ang tourist police una matapos ang tuig. Kini langkuban sa usa ka platoon o equivalent ngadto sa 30 ka personahe depende sa circular nga aprobahan sa National Police Commission (Napolcom).
"It is a unit that will specialize -- ang training nito is from DOT (Department of Tourism). The strength will depend on the number of trained tourist police personnel, but we will start with the platoon and then after training dagdagan natin," dugang pa niya.
Ang mga personahe ipakatag sa espisipikong lokasyon palibot sa isla.
Dugang ni Escobal nga ang puwersa magagikan sa Regional Mobile Force Battalion.