GAWAS sa pagsuta sa mga presyo tan-awon usab sa City Price Coordinating Council (CPCC) ang "sale" kuno apan susamang pagpangilad tungod kay mas barato pa ang orihinal nga presyo niini.
Gibutyag ni Atty. Edgardo Egay Uy, tsirman sa CPCC nga makita nga dunay nagsirkular sa social media kalabot na sa giingong "sale" sa mga produkto apan diay mas mahal ang presyo nga naka "sale" kumpara sa orihinal niini nga presyo.
"Naay nakabutang daw nga "sale" pero pagtan-aw mas barato diay," matud ni Uy.
Gidugang pa nga sutaon kini kung dunay mga patigayon nga susama niini.
"Atong tan-awon kung gabuhaton ni sa Cagayan de Oro kay naa may mga report pud of course makita nato sa social media nga sa ubang lugar gihimo na atong tan-awon kung naa ba na sa Cagayan de Oro," dugang pa.
Gitakdang sutaon usab sa CPCC ang pagmonitor sa mga presyo sa palaliton ilabi na sa mga noche buena products kauban ang meat inspector aron masiguro usab nga luwas ang katawhan sa mga produktong apektado sa African Swine Fever.