GISIGURO sa City Price Coordinating Council (CPCC) nga magsaulog nga luwas ang katawhan sa dakbayan ning Pasko ug Bag-ong Tuig dinhi sa siyudad sa Cagayan de Oro.
Gipahigayon sa CPCC kauban ang Department of Trade and Industry (DTI) ang tinuig nga pag-inspeksiyon sa mga Christmas lights.
Gibutyag ni Rozanne Marie San Juan sa DTI nga tinuig kini nga inspeksiyon aron masuta nga luwas ug standard ang napalit nga produkto sa mga konsumidor.
"Annual nato ginahimo para to check and verify nga kanang mga Christmas lights ginapalit nato sa atong mga establishment certified gyud ni Bureau of Product Standards," matud ni San Juan.
Gidugang pa nga kinahanglan nga tan-awon sa konsumidor nga dunay logo sa Imported Commodity Clearance (ICC) o certified product safety nga globe nga dunay tsek ug kung wala kini kinahanglan nga mangutana kung dunay certification nganong walay nakapikit nga sticker.
Samtang nibutyag usab si Atty. Edgardo Egay Uy nga tumong niini nga malayo sa kakuyaw ang mga katawhan sa dakbayan.
"Ang katuyoan lage niini nga ipalayo nato sa kakuyaw ang mga gagamit sa mga substandard nga mga produkto," matud ni Uy.
Nanghinaot usab kini nga wala nay makita nga mga substandard nga mga produkto diha sa mga tindahan.
Gidugang pa niini nga gamay nalang niadtong nilabay nga tuig gani gipangputol-putol nalang kini kumpara sa mga nilabay nga mga tuig nga kinahanglan gamitan og pison tungod sa kadaghan.
"So gamay nalang gyud hinaot nga karong tuiga wala nay makita nga non-compliant," dugang pa.
Kung dunay makumpiska nga mga substandard nga produkto sa pagpadayon nga inspeksiyon gubaon kini aron nga masigurong dili na kini mabalik sa pagbaligya.
Anaa sa pinakataas nga multa ngadto sa P5,000,000 kung mapamatud-an nga nakalapas sa balaod.
Sa pagsulat niini walay nakumpiska nga mga produkto apan dunay mga naka-display nga wala napikitan og sticker nga nagpamatuod nga nipasa kini sa BSP rason nga gipakuha una kini sa tindahan ug mabalik lang kung ma kumpleto na sa pagpikit sa maong sticker sa ICC o sa certified product safety.