ANG katungod sa mga bata, labi na sa masuso, nga mabuhi, maprotektahan, kabahin sa katilingban ug dugang paglambo.
Kini gihimug-atan ni Talisay City Mayor Gerald Anthony Gullas atol sa iyang pagpadangat sa State of the Children’s Address (Soca), Miyerkules sa buntag, Nobiyembre 27.
Gitug-an ni Gullas nga gihimo nila sa kagamhanan sa dakbayan sa Talisay agig pagduyog ug pagsuporta sa kasaulugan sa 27th National Children’s Month u gang ika-30 nga anibersaryo sa United Nations Convention sa katungod sa mga bata.
Daan na nga nalakip sa 8-point agenda ni Gullas sa pagsugod sa iyang pamunuan ang kalabot sa programa alang sa mga bata, gani maglakip na gyud niini ang mga inahan.
Diha sa iyang Soca iyang gi-report nga sukad sa iyang paglingkud aduna na 3, 813 ka mga masuso nga fully-immunized sa 22 ka mga barangay health centers.
Usa sa iyang gitan-aw nga best practice sa Talisay City health ang gitawag nga ‘call cards’, diin ang mga inahan nga mopalta sa lang immunization schedule, ang tawgan sa barangay health clinic, aron mapahinumduman.
Aduna silay natala nga 538 ka teenage pregnancies nga 100 porsyento gitabangan diha sa ilang prenatal ug post natal services.
Giangkon sa mayor nga ang syudad sa Talisay ang nitala man og 3.56 percent sa malnutrisyon kun 1, 255 ka mga bata, ni-menus na kini sa niaging tuig nga 3, 404 nga na-record nga malnourished nga mga bata.
Kalabot sa pag-proteher sa mga bata, gipasigarbo sa mayor nga pabilin nga awardee ang syudad sa Seal of Child Friendly Governance ug child protection for Cebu against sex tourism.
Anaa kanunay 24 oras ang LGU-owned nga child friendly facility alang sa mga giabusar nga kabataan, gani lakip na sa kababayen-an.
Diin niabot na 58 ka mga kliyente ang gitabangan ning tuiga, 25 niini mga bata, 10 mga hamtong nga kababayen-an, 15 ka mga sexually abused, upat physically abused ug laing upat ang na-rescue tungod kay biktima sa human trafficking.
Gigahinan kini og pundo nga P3 milyunes.
Anaa usab ang residential youth home alang sa mga batang’ in conflict with the law.
Diha sa Aksyon Agad nga pangagamhanan ni Gullas, iyang giklaro nga lakip ang kabatan-unan sa iyang aktibo nga gipasalmot ug gikuhaan og mga ideya ug solusyon sa mga problema sa dakbayan ilabi na og maglambigit sa kabataan.
Kasagaran niini pinaagi usab sa tabang sa Sangguniang kabataan.
Suportado usab sa kagamhanan ang mga gilangkuban nga mga tigi sa mga tinun-an, sa sports, edukasyon, sayaw ug uban pa.
Alang sa right to development, gihimug-atan ni Gullas nga usa kini sa adunay dakung tipik sa ilang pangagamhanan, ilabi na ang pagsiguro sa pagahatag og dekalidad nga edukasyon.
Hinungdan nga libre nga tuition ug uban pa diha sa Talisay City College ug ang cream of the Crop nga scholarship program.
Anaa usab ang Early Childhood Care and Development System. (FMD)