USA ka 50-anyos nga lalaki nakit-ang wa nay kinabuhi sud sa iyang lawak didto sa lungsod sa Padada, Davao del Sur.

Nakit-ang patay na si Teofisto Datuin, biyudo, didto sa dalang Mabini, Barangay NCO District sa lugar, mga alas 7 sa buntag, Marso 12.

Sumala pa nga natingala ang silingan sa biktima tungod wala na kini migawas sa iyang pinuy-anan, mao nga ilang gisubay.

Si Inspector Arnold Absin, nikanayon nga sa ilang pag-responde nasayran nga bugtong ang biktima lang ang anaa sa iyang balay niadtong higayona.

Pag-abot sa mga pulis, naghigda sa iyang katre ang biktima ug wa na kini gininhawa.

Apan matud sa kapulisan nga ilang nasayran gikan sa manghod nga babaye ug kabanay sa biktima nga nag-antos sab kini sa sakit nga "asthma," bag-o lang sab kining niguwa sa ospital.

Dugang pa, igo na lang silang gipahibawo sa paryente niining si Ariel Datuin kalabot sa gidangatan sa 50 anyos.

Gidala na lang sa kapulisan didto sa Mariscal Funeral Homes sa lugar ang patay'ng lawas sa biktima samtang gipadayon nila ang pagpanubay aron lantawon kun wa bay'y nahitabong "foul play" sa iyang kamatayon. (Dondon Dinoy)