ANG Anad party-list wala mahadlok sa mga pagpanghasi nga gihimo sa mga rebeldeng New People's Army (NPA) sa mga campaign volunteers sa Team Nograles didto sa distrto sa Paquibato, siyudad sa Davao niadtong Huwebes.
Ang pagpanghasi nahitabo sa alas 11:45 sa buntag didto sa Sitio Manipis, Barangay Paradise Embak, distrito sa Paquibato.
Gisunog sa mga rebelde ang campaign materials ug gisakmit ang Nissan Frontier Navarra nga dunay plate number LGN-855 nga gisakyan ni Ramon Garcia ug Joel Yamyamin, mga campaign volunteers ni Speaker Prospero Nograles.
Bisan sa gihimong pagtanom og Improvised Explosive Device nga mibusikad sa sakyanan sa mga sundalo sa 69th Infantry Batallion nga nangita sa sakyanan nga Nissan Navarra ni Nograles, wala nakapalisang sa Anad nga mangampanya sa distrito sa Paquibato ug ubang lugar sa siyudad sa Davao, sigun ni Anad party-list representative Pastor "Jun" Alcover sa Superbalita.
Sa maong pagbusikad, upat ka mga sundalo ang nasamdan dihang ilang naagian ang land mine didto sa Sitio Guinobaton, Barangay Paquibato Proper sa alas 3:00 sa hapon niadtong Biyernes.
Ang Anad party-list nanghimaraot sa mga NPA kinsa misakmit sa sa sakyanan sa Team Nograles, misunog sa campaign materials ug mipabusikad sa landmine pinaagi sa pagsulti nga usa kadto ka terorismo nga binuhatan nga dili angay pasayluon sa katawhang Dabawenyo.
Bisan pa sa maong insidente, ang AnadD ug Bantay Party-list nagpahayag nga ilang dayunon ang plano nga maglusad og peace caravan karong Marso 28 didto sa Paquibato District.
Atol sa maong adlaw, ila sab ilusad ang usa ka indignation rally batok sa mga NPA nga magsaulog sa ilang ika-41 nga anibersaryo.
"No amount of gangsterism can discourage us from our pro-democracy and pro-peace advocacy. In any event, we would hold Mayor Duterte, who openly and immorally collaborated with the Maoist communist terrorists, responsible for any harm that the NPA terrorists may cause on Anad and Bantay members who would join the peace caravan and indignation rally in Paquibato on March 28," deklara ni Alcover.
Sayo niini, si Mayor Rodrigo Duterte naghinaot nga molampus ang kalihukan ni Alcover karong Marso 28 pinaagi sa pagsulti nga "good luck" sa ilang kalihukan.
Ang pahayag sa mayor miguwa dihang gipangutana kung unsay iyang reaksiyon sa laraw sa pundok ni Alcover nga mosaka sa distrito sa Paquibato.
Bahin sa pagsakmit sa campaign materials ug sakyanan ni Nograles, si Ka Simon Santiago, tigpamaba sa NPA Southern Mindanao Region, nagpahayag nga ilang gisilotan ang Speaker sanglit wala misubay sa balaod sa NPA sama sa pagbayad og permit-to-campaign fees aron libre nga makapangampanya sa ilang teritoryo. (AD)