NANAWAGAN si Cebu Olympian marathoner Mary Joy Tabal nga menusan ang negatibo nga mga komentaryo sa social media kabahin sa mga kakulian nga nahitabo sa pag-host sa Pilipinas sa Southeast Asian Games.
Gipahungaw kini ni Tabal sa gipahigayon sa Cebu City government nga ceremonial send-off alang sa 28 ka Sugboanong mga atleta ug walo ka coaches nga mokampanya sa SEA Games kagahapon sa dancesport studio sulod sa Cebu City Sports Center.
Ang ceremmonial send-off gipangulohan nila ni Cebu City mayor Edgardo Labella, bise mayor Michael Rama ug mga konsehal sa dakbayan.
Si Tabal, kinsa modepensa sa iyang titulo sa full marathon sa 2019 SEAG, mitambag sa kauban niyang mga atleta nga dili lang una mogamit og social media ug magtutok lang sa pagpangandam alang sa kompetisyon.
“Avoid lang sa siguro mi og social media kay daghan among nabasahan ug among nakita more on negativity instead og mag-share og mga positive news nga unta maka-encourage sa atong mga athlete,” matod ni Tabal sa Superbalita Cebu.
“Ako mismo affected sad ko kay we are representing the country kay kami mga athlete ang mo-fight and knowing nga atoa man gud nasud ang nadaot.”
Imbes nga mopagawas og negatibong mga komentaryo, angayan nga tabangan na lang ang gobiyerno sa pagpangandam niini aron wala na’y kakulian nga mahitabo ug mahapsay na ang pag-host sa nasod sa matag duha ka tuig nga kompetisyon.
Nanghinaot si Tabal nga masulosyunan ra dayon sa gobiyerno ang problema nga giatubang sa mga atleta gikan sa laing nasud, kay nakasabot usab siya sa kahimtang sa usa ka atleta.
Sa iyang bahin, si Labella nipadayag og kaandam sa pagpadangat og suporta ngadto sa Sugbuanong mga atleta.
Gipasabot ni Labella nga nagplano siyang molarga sa Manila aron personal nga mosusi sa kahimtang sa Sugboanong mga atleta. (FMD)