NINGPATIGBABAW ang mga pambato sa Los Angeles Clippers nga sila si Paul George ug Kawhi Leonard batok sa European nga panagpares sa host Dallas Mavericks sa kombati sa dekalidad nga mga puwersa sa Western Conference sa NBA kagahapon.
Si Leonard nagpauwan og 28 puntos samtang nidugang og 26 puntos si George aron agakon ang Clippers sa ikaunom niining sunodsunod nga kadaugan, 114-99.
Ang Clippers migamit og ubay-ubay nga mga tawo aron pakgangon ang Dallas franchise record ni Slovenian Luka Doncic nga upat ka sagunsong mga duwa nga nakahimo siya og labing minos 30 puntos ug 19 assists.
Ning kombatiha, si Doncic, kinsa maoy kasamtangang Rookie of the Year, igo lang nakamugna og 22 puntos ug unom ka assists.
Ang 7’3” Latvian nga si Kristaps Porzingis igo lang sab nitunol og 15 puntos ug 10 rebounds alang sa Mavericks.
Si George nidugang og career-high unom ka steals aron tabangan ang Clippers nga dili makaabot ang Mavericks sa 100 ka mga puntos sa labing unang higayon ning maong season.
“They’re looking to win a championship; they played like it was a playoff game,” matod ni Porzingis kabahin sa Clippers.
Wala’y sayon nga nahimong puntos si Doncic ning maong duwaa gumikan sa depensa sa Clippers. Kadaghanan sa puntos ni Doncic nagagikan sa freethrow line.
“That’s who we are as a team,” matod ni George. “We pride ourselves on defense. Offensively, we’ve got guys that can score the ball, but we want to make it tough on a nightly basis on whoever we’re playing.”
Ang Clippers mingsaka sa 13-5 nga rekord samtang ang Mavericks nahagbong sa 11-6 nga baraha.
NUGGETS 117, WIZARDS 104
Sa Denver, nagpakatap og 20 puntos matag usa sila si Nikola Jokic ug Jerami Grant aron pangulohan ang kadaugan sa host Nuggets batok sa Washington Wizards. Nidugang og 17 puntos si Will Barton alang sa Nuggets (13-3) nga rekord samtang nangahagbong sa 5-10 nga baraha ang Wizards. (AP, ESL)