KON mosuroy ka sa mga hilit nga lugar sa lalawigan sa Sugbo, imong makita ang mga tarpaulin sa hulagway sa mga opisyales sa gobyerno nga gibutang sa mga dapit nga dunay gipatuman nga mga proyekto sa gobyerno. Morag sigi pa ang kampanya.
Wa hinuon angkona ang proyekto sa gobyerno. Di sama kaniadto nga ang mga proyekto butangan og karatola sa hulagway sa opisyal sa gobyerno ug nga nahimo kini tungod sa paningkamot sa maong politiko.
Mao kini ang “epal” nga gustong wagtangon ni anhing Senador Miriam Defensor-Santiago. Mipasaka siya og usa ka “Anti-Epal Bill” sa Senado nga magdili niini apan mitaliwan na lang siya sa laing kalibotan, wa gihapon kini mapasar.
Nipasaka si Surigao del Norte 2nd District Rep. Robert Ace Barbers og susamang balaudnon sa 2016. Pareho ra ang gidangatan niini sa balaudnon ni Senador Santiago. Gipasaka pag-usab ni Barbers ang maong balaudnon sa Agusto ning tuiga.
Ang dugokan niini mao nga idili ug, di lang kay idili, pagasilotan pa gyud kadtong mga opisyal sa gobyerno nga mobutang sa ilang mga ngan ug mga hulagway sa mga proyekto sa gobyerno nga gigastohan sa salapi sa mga magbubuhis.
Ang House Bill No. 71 ni Barbers magdili sa pagbutang sa ngan, initials, logo o hulagway sa usa ka opisyal sa gobyerno sa pagpahibawo sa usa ka gisugyot, nagpadayon o nahuman na nga obras publikas. Idili sab ang pagbutang sa ngan ug hulagway sa mga public service projects ug sakyanan sa gobyerno.
“Crediting individuals instead of the government on any public work, project, assistance or program is unethical and a manifestation of the nation’s deeply troubling political patronage,” matod pa ni Barbers.
Kon mapasar ang maong balaudnon, ipatangtang sa Department of Public Works and Highways, uban sa Department of the Interior and Local Government ug sa Metropolitan Manila Development Authority ang maong mga signages sud sa tulo ka buwan human mo-epekto ang maong balaod.
Gawas pa niini. ang makalapas pahamtangan sa silot nga unom ka buwan nga pagkapriso, multa gikan sa P100,000 ngadto sa P1 million ug perpetual disqualification from holding public office.
Ang House Bill No. 71 anaa pa sa House committee on civil service and professional regulation pinangulohan ni Iligan City Rep. Frederick W. Siao. Sanglit wa pay balaod, panahon karon sa social media sa pagpahibawo sa publiko kinsa kadtong mga opisyales nga nag-advertise sa ilang mga ngan ug hulagway sa mga proyerkto sa gobyerno, mga serbisyo ug sakyanan. (edbarrita@gmail.com)