SUPERBALITA CEBU

Nalzaro: Mga pari magpuyo sa yanong kinabuhi

Saksi

MATOD pa ni Pope Francis nga magdugo ang iyang kasing-kasing kon makakita siya og mga pari ug madre nga magsakay og mahalon og luho nga mga sakyanan. Gipanawagan sa Santo Papa ang mga alagad sa simbahan nga magpuyo sa simple o yano kaayong kinabuhi. Iyang giluwatan ang maong panawagan atol sa lecture sa trainee priests ug mga madre sa Vatican audiotorium karong bag-o lang.

Si Pope Francis, kinsa mao ang ika-266 nga Santo Papa, misaway usab sa mga pari ug kamadrihan nga nagbaton o naghupot og mga mahalon nga mga gadgets sama sa cellular phones. Ang mga sakyanan gikinahanglan na karong panahona apan kanang dili mga mahalon nga sakyanan sa mga alagad sa simbahan. Angayan nga huna-hunaon sa mga kaparian nga daghang mga tawo labi pa ang mga bata nga gipanggutom karong panahona.

Si Pope Francis, kinsa sa tinud-anany nga kinabuhi mao si Bishop Jorge Mario Bergoglio, 76 anyos, misagop kini sa yano kaayo nga pagpuyo human kini mi-asumir isip Santo Papa gikan kang Pope Benedict 16th. Nagpuyo lang kini sa guest house sa Vatican inay sa mahalon mga Papal apartment. Usa ka Argentinian bishop, ang Santo Papa, nakigbatok sa kakabus Sa dihang Obispo pa siya kaniadto didto sa Argentina mosakay man lang kini siya og public transport. Apan dili na puwede karon gumikan sa siguridad.

Mas palabihon pa sa Santo Papa nga makighugoy-hugoy sa mga kabus ug timawa kay sa mga adunahan. Insakto kaayo kining panawagan sa Santo Papa ngadto sa mga kaparian. Kay daghan kaayong mga pari diha nga naglunang sa ilang mga bahandi. Gikan ra ba usab sa katawhan. Wala na magtamud ang uban sa ilang gipanumpaan nga mao ang vow of poverty.

Ang ubang nga kaparian, mag-inilogay kon diin nga dagkong parokya madestino kay atoa didto ang dakong kuwarta. Mao unta kini ang angayang isilsil sa alimpatakan sa mga kaparian ang kanunay’ng pahimangno ug gihimo sa Santo Papa. Dili magpa-ulipon sa bahandi. Amen. (bobbygnalzaro@gmail.com)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph