GIUNAY og tulis ug gipatay sa iyang kaubanan sa sindikato sa drugas ang motibo sa pagpatay sa lalake nga naugkat sa gilubngan niini sa Barangay Lagtang, Dakbayan sa Talisay, niadtong Lunes sa gabii, Nobiyembe 25.

Kini ang gitug-an ni Police Major Gerard Ace, hepe sa Talisay City Police Station, human nga ilang nasikop ang upat sa lima ka mga tawo nga gitudlo nga killers sud lang sa dul-an duha ka adlaw human napalgan ang biktima. Nailhan na usab sa kapulisan ang biktima nga mao si Juniel Amamangpang Cabiluna, taga Barangay Jaclupan sa mao nga siyudad.

Ang mga suspek ang nasikop sa managlahi nga gihimo nga buy-bust ug hot pursuit operation sa Talisay Police, tinabangan na sa mga sakop sa 1st ug 2nd Provincial Mobile Force Company, Miyerkules sa hapon ug sa gabii, Nobyembre 27, diha ra sa barangay Lagtang. Giila ang usa sa mga suspek nga si Jener Abellana Bacus, kinsa nasikop alas 5 Miyerkules sa hapon.

Nakuha gikan kaniya ang pinakete sa gituohang shabu nga mobalor og dul-an sa P30,000.

Nakuha usab gikan kang Bacus ang usa ka di lisensyadong armas.

Sa padayon nga operasyon, alas 9 sa gabii sa sama nga adlaw, nasikop usab si Xavier Jason Cabier ug nasakmitan og kapin sa P30, 000 nga balor sa shabu ug usa usab ka unlicensed firearm.

Alas 9:50 sa gabii, nasikop sila sila Arwen Calinawan ug Rommel Bacacao sa hot pursuit operation.

Samtang padayon gipangita ang laing suspek nga giilang si Christopher Anyol.



Dunay saksi

Matod ni Police Major Gerard Ace Pelare, hepe sa Talisay City Police Station, nga nailhan ang mga suspek pinaagi sa tabang sa usa ka saksi sa kremin. Giingon nga ang saksi niagi lang unta sa dapit nga nahitabuan.

Gitug-an ni Pelare nga sa pakisusi, ilang nasuta nga gipatay ug gitulis nila si Cabiluna alang lang sa libre nga paggamit sa shabu.

Giingon nga si Cabiluna usa ka drug supplier. Dugang ni Pelare, newly identified drug player kini sa TCPS.

Ang lima ka mga suspek giingon nga nihangyo kang Cabiluna nga libreng suplayan og ilegal nga drugas apan, wa mosugot ang biktima, hinungdan nga gipatay.

Gihimakak ni Bacus ang kremin ug gitudlo niini ug sa kaubang mga nasikop nga si Anyol, kinsa pabiling nagtago-tago, ang nipatay sa biktima.

“Wala koy labot ana, si Christopher (Anyol) ang nipatay ana,” saysay ni Bacus.

Sa dugang pakisusi, nasuta nga ang mga suspek ug si Cabiluna kauban lang sa usa ka drug syndicate.

Apan padayon pa kini gisuta sa mga pulis kon kang kinsa nga linya sa mga drug lord.

Giila usab ang mga suspek nga lakip sa mga responsable sa mga tulis sa dakbayan sa Talisay ug sa silingang siyudad ug lungsod sa niaging mga bulan.

Nihimo na usab og inventory ang mga pulis sa ilang natala nga mga kaso sa tulis sa siyudad kon motugma ba ang upat sa mga gihulagway sa mga biktima nga nanulis kanila.

Gun for hire

Dugang ni Pelare nga nasuta usab nga ang lima mga gun-for-hire nga maoy suguon sa drug personalities pagpatay sa ilang mga kompetensya ug niadtong mga nakautang kanila, sama nalang sa wala maka-remit sa halin.

Sa maong nakuha nga mga kasayuran, gitug-an ni Pelare nga usa lang kini sa mga pagmatuod nga adunay mga nalambigit sa drugas nga nag-unay na sa pagpatay sa ilang makompetensya.

Gipasalamatan ug personal nga gi-congratulate ni Talisay City Mayor Gerald Anthony Gullas ang kapulisan sa Talisay sa dinalian nga pagkasikop sa gitudlo nga suspek sa kremin ug kasulbaran niini.

Si Gullas ang nituyo pag-adto sa TCPS Huwebes sa buntag, Nobiyembre 28.