NIA na si Pablo sa dapit diin nagtago ang iyang anak nga si Victor. Gipangita karon sa mga pulis si Victor tungod sa kaso diin siya nahilambigit. Apan matod pa ni Victor sa iyang teks nga gidamay da siya sa maong krimen nga wala niya mabuhat kay wala siya niadtong gabhiona kanus-a nahitabo ang krimen. Sila si Florentino, Elmer, Bob ug Menandro ang mitabang og lugos sa usa ka ‘beauty queen’ sa ilang lungsod. Si Minerva ang biktima nilang Florentino. Nakaila si Victor kang Minerva kay klasmeyt kini niya sa hayiskol sa ilang lungsod. Iyang mga higala sila si Florentino ug nahakuyog na gani siya sa mga lakaw nila sama sa piknik, pangayam ug uban pang matang sa lulinghayaw. Kay nasabtan ni Victor nga morag may laing tumong ang iyang kabarkada, nakahukom siyang mobiya sa grupo. Ug tungod sa kalagot ni Florentino nga mobiya siya kanila, siya si Victor ang lider sa maong ‘gang rape.’ Apan alang kang Victor, saksi ang Ginuo nga dili siya lampingasan nga tawo ug dili sab siya tawo nga manlulugos o ‘rapist.’
Gilantaw ni Pablo ang payag diin tua karon si Victor magtago. Midali siya pagduol sa payag. “Papa, maayo kay mianhi ka. Wa bay nakabantay sa imong pag-anhi dinhi? Kay basig nasundan ka,” ni Victor nga mabalak-on ang nawong.
“Wa, wala, Victor. Gisiguro nako nga way nahibawo ning akong pag-anhi dinhi, ning halayong bukid. Tua sa ubos sa usa ka karenderiya nako ibilin ang akong kotse,” hinayng namulong si Pablo. Mituhop sa iyang kasingkasing ang kaluoy ngadto sa anak. Unya mipadayon siya pagsulti, “Mituo ko nimo, anak, nga di ka apil sa gibuhat nilang Florentino. Nasayod ko unsa ikaw, kay anak tika. Buotan ka. Gani sa wa pa molambo ang atong negusyo, mitabang ka man. Ikaw gani ang matawag nga ‘bread winner’ sa atong pamilya.”
“Papa, dili ko magpadakop, kay wa nako mabuhat ang ilang gipasangil nako. Ila kong giduot nga maoy lider. Salbahis gyud ang pagka tawo si Florentino. Nagmahay ko nganong nakigsuod ko nila!” Milugmaw ang mga luha sa mga mata ni Victor. “Pa, kumusta diay si Mama Sonya ug ang duha ko ka manghod?”
“Naguol sila pag-ayo, Victor. Ug mituo sab sila nga wa kay labot sa maong krimen. Sila si Florentino nagtingkagol na sa prisuhan ug gipasakaan nag kaso. Ug ikaw, ‘wanted’ na sa mga pulis nga nagpangita na kanimo.” Gitrapuhan ni Pablo sa iyang panyo ang mga luha nga midaligdig sa iyang mga mata.
Human sa ilang panagsultianay, sa dayon nang lakaw ni Pablo gibinlan niya si Victor og usa ka krusipiho nga pilak aron malikay kini sa kadaot ug katalagman.
Usa ka gabii gibati ni Pablo ang kamingaw kang Victor. Milupad ang iyang hunahuna balik sa kagahapon kanus-a gagmay pa sila si Victor ug ang duha niini ka manghod nga sila si Ebet ug Junny. Pagkanindot handumon sa kagahapon uban sa iyang pamilya kanus-a gagmay pa ang mga bata. Karon hinuon nga nahaw-as na sila sa kawad-on gihasol na hinuon sila sa usa ka dakong problema, usa ka matang sa pagsuway nga hilabihan kalisod, nga daw mogisi sa iyang kasingkasing. Mao nga iya na lang gitugyan sa Diyos ang tanan. Ug ning gabhiona nag-ampo siya, naghangyo sa kinasingkasing sa Labawng Makagaghom nga luwason Niya si Victor sa kabug-at sa pagsuway nga gisagubang niini.
PAGLABAY sa mga adlaw nadakpan si Victor sa mga pulis. Gipreso siya uban nilang Florentino. Si Pablo mikuhag abogado aron paglaban kang Victor. Sa korte misulti si Victor nga dili siya lider nilang Florentino nga nasilag kaniya kay nibiya siya sa grupo. Ug sa pagka hitabo sa krimen didto siya sa balay sa higalang babaye kay birthday niini. Misaksi ang babaye pagmatuod nga tinuod ang gisulti ni Victor. Ug dihang gipresentar si Minerva isip biktima, giila niya sila si Florentino, Alex, Elmer, Bob ug Menandro nga maoy nagpuli-puli pagbuong sa iyang dungog. Dihang gipakita sa korte si Victor, misulti si Minerva sa matuod nga dili apil si Victor sa krimen, kay nakaila siya kang Victor. Klasmeyt sila kaniadto sa hayiskol sa lungsod.
Human sa pipila ka bulan nga pagbista gibasa didto sa korte ang hukom sa huwes. Nagpadayon ang pagka binilanggo ni Florentino ug sa iyang upat ka kabarkada. Na-absuwelto si Victor. Nagpamisa si Pablo isip pasalamat sa Ginuo nga gidungog Niini ang iyang pag-ampo.
(Katapusan)