KAADLAWON pa mibangon na silag sayo. Mao nga sayo usab silang nakasakay og bus ug nahiabot sa dapit nga ilang adtoan. Gikan sa ilang lungsod ug ania na sila karon sa usa ka dalan paingon sa edipisyo nga ilang sak-on diin didto ang dakong hotel nagkinahanglan og mga kawani sa pagbukas niini. May gitakda nga oras ug napiho nila nga hataas kaayo ang lumbay sa mga aplikante niini. Katapusan nang adlaw sa pagpanawat og mga aplikante.
Mga gradwado sila sa hotel and restaurant management. Mag-agaw sila si Piolo ug Daniel ug magkatalirungan ang ilang panuigon.
Samtang naglakaw sila aron molabang sa pikas dalan, may awto nga bulok puti nga nabanggaan sa laing awto. Ang nakabangga nga awto misibat lang ug ang nabanggaan nahapunta sa center island sa dalan ug napiyapi og diyutay ang tuong kilid niini. Sanglit sayo pa sa kabuntagon, nihit pa ang mga tawo nga naglakaw sa kadalanan. Mao nga midali sila sa pagduol aron pagluwas sa luwan sa awto. Buhi pa ang nagmaneho, apan may bun-og ug samad sa ulo ug sa lawas. Ila kining giagak pagpagula sa awto. Nagsaguyod pa ang drayber nga usa ka hamtong nga babaye. Ila kining gibaswat.
May taksi nga nahiagi ug ila kining gipara. Gidala nila ang hamtong nga babaye sa usa ka ospital. Nagkinahanglan og abuno sa dugo ang pasyente ug dinalian. Mitanyag silang mag-agaw dihang nahibaloan nila nga susama kinig tipo sa ilang dugo..
Naudtuhan na silang nakabiya sa ospital. Napakyas na sila pag-adto sa gitumong
nilang dapit. Mipauli sila sa ilang lungsod nga nagminghoy. Nalimtan pa man gani nila sa ospital ang mga dokumento nga gikinahanglan sa mga aplikante.
Managsilingan ra silang mag-agaw ug suod kaayo. Maskin napakyas sila, gidasig
gihapon sila sa ilang mga ginikanan.
“May suwerte pang moabot,” matod pa sa ilang mga ginikanan.
Apan nahinugon gayud sila. “Mama, ilado ang hotel sa tibuok nasod ug sa tibuok
kalibutan. Kon nadawat pa kami, may puruhan nga makapanarbaho kami sa uban nilang mga hotel sa laing mga nasod.”
Milabay ang usa ka buwan. Kalit lang may mitawag sa ilang selpon ug mipahibalo nga paadtuon sila sa hotel nga ilang giaplayan. Ang general manager sa hotel ang nangita kanila ug mipakita kini sa iyang dagway sa mahalong gadget niini. Giingnan silang duha nga dili na magkinahanglan og mga dokumento kay nabasa na sa manedyer ang ilang mga resume..
Ang dagway sa manedyer mao ang hamtong nga babaye nga gidala nila sa ospital.
(Katapusan)