ADUNAY hipukritong mga tawo nga kanunay nga manghadlok nga kita gikuntrolar na sa China. Kadaghanan kanila moingon nga kining pagpa-utang sa China kanato alang sa mga infrastucture project ubos sa Build, Build, Build ni Presidente Rodrigo Duterte nga dili nato mabayaran mao na kuno unyay maghatag sa China og kahigayunan nga makontrolar na niini ang maong mga proyekto dinhi. Ila gayud nga ipanghadluk ang China sama sa usa ka inahan nga muhadlok sa iyang anak sa abat.
Apan samtang sige kitang likay-likay nga dili kita makuntrolar sa China apan angayang masayran sa tanan nga gikuntrolar na kita sa maong nasud niadto pang 2009. Niadtong tuiga gibaligya sa atong gobiyerno ang Transmission Corporation (Transco) ngadto sa usa ka adunahang negosyante nga mibaligya usab sa 40% niini ngadto sa gobiyerno sa China. Mao kini ang nahipatik sa usa ka government report nga gipreparar alang sa mga magbabalaud.
Na-alarma ang mga magbabalaud sa dihang gisugid sa maong report nga ang mga Chinese engineers lamang ang bugtong adunay access ug kasayuran sa mga importanteng element sa NGCP. Mahimo nilang pid-okan o pagngan og kuriyente ang mga factory, planta, military installations, kabalayan ug ang tanang nagkuha og koriyente pinaagi sa NGCP. Mahimo gani nga i-blackout nila ang Pilipinas panahun sa kagubot labi na batok sa ilang nasud bisan pinaagi lamang sa remote control. Mao kini ang sitwasyon nato sukad pa niadtong 2009 unya karon pa kita moingon nga mahadlok kitang kontrolahon sa China? Kining maong kahimtang nato resulta sa kahakug sa salapi sa namunoan kaniadto.
•••
Sigun sa gipaabut sa kadaghanan nga dili gayud magdugay si Bise Leni Robredo sa iyang pagka-czar sa anti-drugs. Daghang nagpaabut sa resulta niadtong murag drama nga pagtudlo ni Presidente Rodrigo Duterte kang Robredo. Daghang nagtuo nga dili dawaton sa bise presidente ang maong tanyag tungod kay mura kinig laang aron lang gayud siya mabitik tungod kay dili man lalim ang maong trabaho labi na sa sama kaniya nga walay igong alamag sa anti-drug campaign. Daghang nakurat sa dihang iyang gidawat kini. Apan inay iyagyag ang iyang mga solusyon kon unsaon ang pagsulbad sa dakung problema sa drugas murag iyang gipalagut ang presidente pinaagi sa pagkunsolta sa mga tinugyanan sa US embassy ug sa usa ka pundok sa United Nations (UN). Nasayud kita nga dili gusto si Duterte nga mag-apil-apil ang ubang mga nasud, labi na ang US ug UN, nga kritikal kaayo sa iyang war on drugs tungod sa extra-judicial killings (EJK). Tungod niini wa kapugni sa presidente ang pagsaway kang Robredo hangtud nga misangput kini sa iyang pagkatangtang.
Apan alang kanako dili importante kon unsa ang natampo ni Robredo sa anti-drug campaign kundili ang publicity nga iyang naani sa hamubo niyang pagka-drug czar. Ang labing daku niyang naangkon nga pasidungog nga siya mao gayud diay ang giila ni Duterte nga maoy napiling bise presidente sa nasod. (mannyrabacal1144@gmail.com)