USA ka maid nangayog umento sa sweldo gikan ni misis. Ingon si misis, “Hatagi kog tulo ka rason.” Ang maid niingon, “Una, mas maayo ko moluto kay nimo.” “Kinsay nag-ingon?” matod ni misis. “Si sir,” tubag sa maid. “Ikaduha, mas maayo ko moplantsa kay nimo,” matod sa maid. “Kinsay nag-ingon?” sukna ni misis. “Si sir,” matod sa maid.
“Ikatulo, mas maayo ko moromansa kay nimo.” “Si sir na sad nimo ang nag-ingon?” pangutana ni misis. “Di oy, ang atong drayber,” tubag sa maid. Ingon si misis, “Hinaya imong tingog diha. Unsa, paigo na ning umento nga dos mil?”
Sagad nga mosaka ang presyo sa mga palaliton labi na kon magsingabot ang Pasko. Mao na nga usa ka employer niingon ngadto sa iyang mga empleyado, “Pero di tanan mosaka. Kay di man mosaka inyong sweldo.”
•••
Maayo na lang nga giumentohan sa Regional Tripartite Wages and Productivity Board (RTWPB) 7 og P18 ang daily minimum wage sa Central Visayas niadtong Martes, Nobyembre 26, 2019.
Tungod niini, ang bag-ong inadlaw nga sweldo sa mga micro-business nga adunay 10 ka mga empleyado o labaw pa mahimo nang P404 samtang ang mga kompanya nga anaay minus sa 10 ka mga empleyado mahimo nang P396 ang adlaw.
Gihangop kini sa Associated Labor Unions-Trade Union Congress of the Philippines (ALU-TUCP). Si Atty. Nora Analyn Demeterio-Diego, vice president sa Central Visayas sa ALU-TUCP niingon nga nalipay sila sa umento nga ipatuman sa di pa matapos ang 2019.
•••
Apan niingon siya nga magul-anon sila nga P18 ra ang umento nga giaprobahan kay P300 nga umento sa inadlaw nga sweldo man ang ilang gipangayo. Sinsilyo ra ang giaprobahan, matod pa niya.
Unsa man gyud ang insaktong sweldo nga angay nga ihatag sa mga empleyado? Ang management modayon og hulga nga manira sa ilang negosyo kon dako ang aprobahan nga umento.
Hain ang palabihon, dako ang minimum nga sweldo apan daghan ang way trabaho o gamay nga umento pero dunay trabaho? Matod pa sa Korte Suprema, “beggars cannot be choosers.”