Nalzaro: P18 limos lang
NA-APROBAHAN na sa Regional Tripartite Wages and Productivity Board (RTWPB 7) ang umento sa suweldo sa mga mamumuo sa Metro Cebu area. Ang RTWPB mihatag og P18 nga umento sa daily minimum wage diin maghatud na kini sa inadlaw nga suhulan ngadto sa P404 alang niadtong mga kompaniya nga adunay sobra sa napulo ka mga empliyado. Ang Metro Cebu naglangkob sa mga dakbayan sa Sugbo, Mandaue, Lapu-Lapu, Talisay, Naga, Carcar og Danao. Apil na ang mga lungsod sa Consolacion, Cordova, Liloan, Compostela, Minglanilla ug San Fernando.
Matod ni Philipp Tan, representante sa management sa wage board, nga ilang gihatagan og gibug-aton ang poverty incidence o kawad-on sa mga lugar diin gamay lang ang suhulan. Maayo kay nakahuna-huha sila niini labi pa ang mga representante sa mga kapitalista nga gahi kaayo mohatag og umento. Unya kon mamugos ra ba ang mga representante sa labor sa gipangayo, manghulga dayon ang management mga manira sila.
Ang labor sector labi pa ang Associated Labor Union, Trade Union Congress of the Philippinee (ALU-TUCP) nangayo og umento sa daily minimum wage og P300 kapin aron nga mamahimo nang P772 ang inadlaw nga suhulan. Apan puwerting layoa o gamay lang ang nahatag. Tiaw ba nimo P18 lang. Limos ra ni. Aw, okey basta naa lang. Pero karong sunod buwan pa gyud ni madawat sa mga mamumuo gumikan kay i-review pa kini sa National Wages and Productivity Commission (PWPC) ingon man sa Department of Labor Secretary (DOLE) unya i-publikar pa sa newspapers una mapatuman.
Pero pastilan no, unsa ang atong mapalit anang P404? Dili pa gyud na igo sa lima ka sakop sa pamilya labi pa kon nagpa-eskuwela ka pa unya nag-abang og pinuy-anan. Dinhi na motumaw ang problema kon adunay magkasakit nga sakop sa pamilya. Magkasiring-siring ta kon asa manghulam og kuwarta. Ang pagka-hospital wa ra ba maapil sa atong budget kada adlaw.
Gamay alang sa mga mamuo, apan dili sab basta-basta mohatag dayon ang kagamhanan sa demanda. Samtang obligasyon sa kagamhanan ang pag-protihir sa katungod sa mga mamumuo, obligasyon usab sa kagamhanan ang pagprotihir sa mga kapitalista. (bobbygnalzaro@gmail.com)