SUPERBALITA CEBU

Davis mipatay sa iyang kanhi team

WA MAKAPAKGANG ang mga boo nga misugat ni Anthony Davis sa iyang unang pagbalik sa New Orleans,.

Ang kanhi pambato sa Pelicans mipabaha og 41 puntos, lakip na ang free throws ug steal sa krusyal nga mga segundos aron ituboy ang Los Angeles Lakers, 114-110, nga kadaugan batok sa iyang kanhi team.

Perming gibiyaan ang Lakers sa unang tulo ka mga quarters nga gani moabot pa og 15 puntos ang labaw sa New Orleans, apan sa sayong bahin sa fourth quarter, si LeBron James miagresibo sa iyang ataki aron duslitan ang dakong rally nga maoy nahimong dalan sa ilang ika-16 nga daog batok sa duha ka pildi.

Ang four-time MVP awardee mitali og 29 puntos, 15 niini sa fourth quarter, ug 11 ka assists samtang si Kyle Kuzma midugang og 16 puntos, diin siyam niini ang nakatabang sa pagpapas sa labaw sa Pelicans.

Ang tres ni Kuzma maoy nagbutang sa Lakers sa lingkuranan sa driver, 111-109.

Natibhangan kini 111-110 sa dihang usa ra sa duha ka free throws ang napasulod ni Josh Hart ug diha pa untay kahigayonan nga masungkit og balik sa Pelicans ang labaw.

Apan way suwerte sanglit igo rang misimhot sa ring ang tres ni JJ Redick.

Nakuha ang bola ni Davis kinsa dali gilayon kining gi-foul. Usa ra man tuod ang iyang napasulod sa duha ka free throws, apan sa dihang naka-intercept kini sa pasa ni James Ingram nakakuha na usab kini og foul.

Ning higayona wala na sipyata ni Davis ang duha niya ka free throws aron iselyo ang kadaugan.

Sa laing duwa, sa ikaduhang higayon, nakapakita na usab sa iyang kahanas si Carmelo Anthony ubos sa iyang bag-ong team Portland TrailBlazers sa dihang ilang gibuntog ang Oklahoma City Thunder, 136-119.

Si Anthony mitimang og 19 puntos ngadto ni Damian Lillard kinsa nangulo nga may 27 puntos alang sa Blazers.

Maayo usab nga nakaduwa si Hassan Whiteside kinsa may 21 puntos ug 16 ka rebounds.

Ang hansak ni Anthony sa fourth quarter maoy naghatag og 111-79 nga labaw sa Portland ug nakapaugyaw sa iyang mga fans.

Sa iyang pagpahuway, mipalanog ang mga dumadapig sulod sa ilang korte sa iyang ngalan “Melo! Melo!.”

Si Kemba Walker mipabaha og 39 puntos ug ang Boston Celtics mibuntog sa Brooklyn Nets, 121-110.

Gipatapsingan sa Charlotte Hornets ang Detroit Pistons, 102-101, samtang gi-magic sa Orlando ang Cleveland, 116-104.

Gipawngan og sonata sa Pacers ang Jazz, 121-102, ug gibuntog sa Sixers ang Kings, 97-91.

Gilubong sa Toronto Raptors ang New York Knicks, 126-98; gipabugnaw sa Houston Rockets ang Miami Heat, 117-108. Nakaipsot ang Clippers sa pagpanghambat sa Grizzlies, 121-119 ug gikuniskunis sa Timberwolves ang Spurs, 113-101.

Gipasawop sa Wizardz ang Suns, 140-132; gipatugpa sa Milwaukee Bucks ang Atlanta Hawks, 111-102; samtang giputlan usab sa Golden State Warriors og sungay ang Chicago Bulls, 104-90. (JBM)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph