ANDAM ug nagpanikad na ang Sugbuanon ug skateboarding sensation nga si Margielyn Didal kinsa nanglantaw sa iyang laing dominasyon sa 30th Southeast Asian Games sunod semana.
Ang 20-anyos nga gold medalist sa Asian Games sa niaging tuig, mo target og duha ka gold medals sa matag duha ka tuig nga kompetisyon sa roller-sports events nga ipahigayon sa Tagaytay Oval karong Disyembre 3 ngadto sa 8.
Ang lumad nga taga barangay Lahug, dakbayan sa Sugbo ang gituohan nga maoy mopatigbabaw sa street ug sa game of skate events sa women’s division.
Gikan sa Estados Unidos diin siya misalmot ug mga kompetisyon, si Didal nahiabot sa nasod sa sayong bahin ning semanaha ug mideritso'g bisita sa iyang pamilya.
Kagahapon gikatakdang mopaingon siya sa Kaulohan alang sa hingpit niyang preparasyon. Sa pagpangulo ni Didal, ang presidente sa Skateboarding and Roller Sports Association of the Philippines nga si Monty Mendigoria nagtuo nga ang nasod moharos sa tanang walo ka events sa skateboarding. (JBM)