GI-ILA nga melting pot of culture maoy gipasigardo sa dakbayan sa Segovia, Spain nga dasok sa mga talan-awon nga susama sa imahinasyon diha sa atong mabasa ug makita fairy tales nga libro o salida.
Ang maong dapit gideklarar nga Unesco World Heritage City sukad niadtong 1985, diin imong makita ang kapin sa 80 ka mga historical nga monumento ug landmarks.
Ang Segovia nahimutang sa aminahang kasadpang bahin sa Madrid, nga nabantog sa tulo ka mga major landmarks nga mao ang mga: Roman Aqueduct, Segovia Cathedral ug ang Alcázar de Segovia.
One day trip
Bisan pa man sa kadaghang talan-awon sa maong dapit apan mahimo nimong masuroy ang maong dakbayan sud lang sa usa ka adlaw.
Sud sa usa ka oras nga biyahe gikan sa Madrid paingon sa Segovia pinaagi sa bus ride nga adunay pletehan nga mokabat sa 10 euros (P561) roundtrip.
Mas bintaha nga mosayo paingon sa dapit samtang mingaw pa, inay ang mokuyog sa bagang panon sa mga lokal ug langyaw nga mga turista nga buot sab mobisita sa lugar.
Sa pagtaak ning tigsuwat sa maong dapit, una nakong gihimo mao ang pagpangayo og libre nga mapa gikan sa ilang tourism center nga anaa mahimutang duol sa bus station.
Land marks
Una kong gibisita ang Saint Millan Church nga maoy pinakaduol gikan sa bus station aron masulit ang akong pagsuroy-suroy.
Ikaduha mao ang paglakaw-lakaw paingon sa nabantog nga Roman Aqueduct nga maoy kasamtangang simbolo sa dakbayan.
Gikan sa kabukiran sa Guadarrama, moabot ngadto sa 15 kilometros ang gitas-on sa “ancient hydraulic masterpiece” lahos ngadto sa centro sa dakbayan.
Nasayran nga adunay kinatibuk-an nga 167 ka mga arko ang aqueduct.
Sunod ko nga gi-adto mao ang Segovia Cathedral nga mas nailhan nga Our Lady of the Assumption and Saint Frutos Cathedral.
Ang engrandeng cathedral nga nahimutang duol sa ilang Plaza Mayor o sentro sa dapit gi-isip nga usa sa mga pinaka-uwahing natukod nga Gothic churches sa Europa.
Ang ikatulo ug akong tambag gikinahanglan nga dili ninyo sipyaton sa pagbisita mao ang Alcázar de Segovia, ang palasyo nga nahimong inspirasyon sa Walt Disney production sa ilang sikat nga Cinderella’s Castle.
Mas bintaha kon magbaktas mo ug subayon ang trail sa Alcázar de Segovia aron makakuha og Instagrammable pictures, paingon na sa park diin inyong makita ang bird’s eye view nga lapad nga hawanan.
Tip
Manage your time sa pagbisita sa Segovia ug i-research ang mga dapit nga buot nimong bisitahon aron di ka maapiki sa oras.
Ang dapit adunay wala ug tuo nga nagkadaiyang museo, karaan nga edipisyo ug uban pa busa take your time ug I-enjoy ang pagpanuroy.
Sikat nga kan-unon
Naila ang Segovia sa duha ka mga pagkaon nga mao ang cochinillo (roasted suckling pig) kun inasal nga baktin sa atong pinulungan ug Racion de Cordero. Wa gyud nako sipyata ang pagtilaw sa maong lami-an nga pagkaon ug sigurado ko nga hasta ka makadayeg sa kalami niini.
Busa kon naglibog ka sa imong pagbakasyon ilabi na sa Uropa ilakip sa inyong bucketlist ang Segovia.