2 ka menor nakuhaan og marijuana dihang giluwas tungod sa curfew

INAY gi-rescue unta gumikan sa kalapasan sa curfew ordinance, hayan posibleng mag-atubang na hinuon og kaso ang duha ka 16-anyos nga menor de edad nga pulos taga Barangay Cambaro, dakbayan sa Mandaue.

Kini gumikan kay atol sa pag-rescue kanila sa St. Bernadeth, Barangay Basak, dakbayan sa Lapu-Lapu nakuha sa ilang posisyon ang pinaugang marijuana nga gibana-banang motimbang og 30 gramos.

Giputos ang naasoyng mga pinaugang marijuana og newspaper ug plastic cellophane.

Mga barangay tanod sa Barangay BAsak ang naka-rescue sa duha uban ang laing menor de edad atol sa gipahigayong halapad nga pagpatuman sa curfew ordinance sa dakbayan.

Matod ni Police Major Juan Capacio, hepe sa Marigondon Police Station, nga dako karon ang ilang pagtuo nga ang naasoyng mga marijuana ipang apud-apod unta sa duha ka menor de edad sa ilang mga kailang menor de edad sa dakbayan.

Posibleng pang konsumo hinuon sa mga menor de edad ug sa mga kaila niini ang naasoyng marijuana isip 'tripping,' matod ni Capacio.

“Kaning mga mga bataa dili man gyud ni taga Lapu-Lapu nilabang lang gyud ni sila naa gyud ni silay tuyo diri sa ilang counterpart,” matod ni Capacio.

Sa kinatibuk-an, moabot sa 11 ka mga menor de edad ang na-rescue atol sa pagpatuman sa curfew ordinance sa dakbayan.

Hinuon, pulos ra mahimong makuha sa mga ginikanan ang mga menor de edad nga na-rescue ubos hugot nga pahimangno, apan ang duha nga nakuhaan ,og pinaugang marjuana gi-turn-over sa Department of Social Welfare and Development (DSWD) alang sa pagtino kun duna bay discernment ang ilang pagbuhat sa salaod.

Kasong paghupot ug marijuana ang ipasaka sa kapulisan batok sa duha ka menor de edad.

“Wala ni pangalan ila grupo abot-abot ra gyud ni sila, tapok-tapok lang,” pagpasabot ni Capacio kung unsa kagrabe ang suliran sa mga batan-ong magtapuktapok panahon sa kagabhion sa ilang area of responsibility (AOR). (GCM)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph