GIMANDOAN sa African Swine Fever (ASF) Task Force sa probinsya sa Sugbo ang tanang mga sakop sa lokal nga task forces nga mas pahugtan ang surveillance ug monitoring sa mga pantalan karon.
Kini human gilibkas na sa pipila ka mga rehiyon nga nagpalibot sa Rehiyon 7 ang ilang ban order sa pagpasulod sa mga produktong baboy gikan sa kaulohan.
Gibutyag ni Dr. Mary Rose Vincoy, Provincial Veterinary Office (PVO) head nga nakadawat sila sa taho nga gilibkas na sa Rehiyon 8 ang ban niini subay usab sa mando sa Department of Interior and Local Government (DILG).
“So we’ll be strengthening our border control facing Region 8 because, we don’t know if ang gikan sa Manila moagi sa port of Matnog and then mosulod sa port of Allen and then Samar,” matod ni Vincoy.
Dugang niya nga tungod sa lakang sa Rehiyon 8, possibleng makasulod ug ipa-lusot na unya ang mga produktong baboy gikan sa mga apektadong lugar sa kauluhan kon dili kini babagan diha sa mga pantalan.
“Mas easier nana ang access, take note nga naa tay Municipality of Pilar which is only 15-20 minutes by fast craft kung by boat ug kung Ormoc City nana siya. We were aware sa nahitabo, possible man nga ang uban products i-agi sa Region 8 padung sa Cebu,” matod ni Vincoy.
Sa milabay nga semana, matod ni Vincoy nga may mga na-monitor na sila nga mga produkto nga nakalusot ug gipaagi sa private vehicles.
Lakip na diha ang mga na surveillance sa task force nga mga produktong gikan sa Luzon nga nasakmit sa isla sa Camotes lakip na sa Bantayan nga gipaagi usab sa Rehiyon 8 o Leyte.
Gimandoan ni Vincoy ang tanang Municipalidad sa Probinsya nga mahimong alerto ilabi na nga nagkaduol na ang pasko ug sagad sa mga putahe nga lutuon, mogamit gyud ug baboy, ug uban pang mga produkto niini.
“We alert the local counterparts atong municipal task force, they have to be vigilant and report to us if naa gyuy mga product,” matod ni Vincoy.
Taliwa sa gihimong lakang sa pipila ka mga Rehiyon nga milibkas na sa ban, pahibaw ni Vincoy nga magpabilin ang ban order sa Gobernador ug gani mulungtad pa kini kutob Hunyo 30, 2020. (ANV)