KAPIN sa P7 milyunes nga balor sa shabu ang nasakmit sa anti-drug operations sa kapulisan sa dakbayan sa Sugbo niadtong Miyerkules, Nobiyembre 27.
Ang mga sakop sa Drug Enforcement Unit (DEU) sa Mambaling Police ubos sa Cebu City Police Office (CCPO) nihimo og buy bust sa Sityo Nipaan, Barangay Sawang Calero, Miyerkules sa gabii ug malampusong nasikop ang managsuong Lewis Lacida, 36, ug Hazel Lacida, 39.
Si PCapt. Francis Renz Talosig, hepe sa Mambaling Police, maoy nangulo sa maong operasyon.
Nasakmit sa buy bust ang gibanabana nga 640 gramos nga shabu gikan sa managsuong Lacida nga mokantidad og P6.3 milyunes base sa Dangerous Drugs Board (DDB) value.
Gihulagway ni Talosig nga si Lewis makonsiderar nga usa ka high value target (HVT) tungod usab sa nasakmit nga shabu sa ilang posisyon samtang, ang maguwang nga si Hazel maoy katabang sa iyang manghod sa ilegal nga negosyo sa druga.
Dugang ni Talosig nga hapit duha ka semana ang ilang pag-monitor sa mga suspek ug dayong lupad sa malampusong operasyon.
Ang suspek nga si Lewis niasoy sa mga pulis nga Ermita ug Pasil lang ang ilang hagbongan o hatdan og drugas apan, dili motuo si Talosig tungod sa halos lukop kabarangayan kutob sa Mandaue na sila ang nailhang agalon subay sa ubang nasikop.
Lakip sa gisulti sa dinakpan nga usa pa lang siya ka semana sa ilegal nga negusyo, nga gikahimuot lang ni Talosig
“Usa ka semana nga kapin sa usa ka semana naman gali namo siya gi-monitor,” dason ni Talosig.
Si Lewis, dihang gihinabi sa Superbalita Facebook live, niangkon sa iyang pag-supply sa drugas.
Dugang sa suspek, sulod sa usa ka semana lang, moabot na sa 13 ka mga putos sa tag 100 gramos base sa iyang pangangkon ang iyang nahalin.
Apan, matod Lewis, tighatod lang siya sa druga ug duna siyay agalon ug nagdumili sa paghingalan niini.
Dugang ni Lewis, P10 mil ang matag semana nga iyang pagadawaton nga suhol nga gamiton usab niya sa pagpalit og tambal nga naparalisado nga inahan.
Sa laing operasyon sa Mambaling Police, usa ka magtiayon usab ang nadakpan sa susamang operatiba pila ka oras ang milabay sa wala pa madakpi ang managsuong Lacida.
Giila ni Talosig ang magtiayong nadakpan nga sila si Manuelito Membrellos, 48, ug Cherry, 34, diin ang lalake lumad nga taga Barangay Ermita.
Nasakmit sa managtiayon ang 105 gramos nga shabu nga mokantidad og P714 mil base sa iyang DDB value.
Laing nadakpan usab sa buwag nga ronda sa San Nicolas Police sa pagpangulo ni PMaj.Kenneth Paul Albotra sa Barangay Sawang Calero.
Nasikop sila si Emelyn Dingtol alyas Melyn, 54, molipyo sa Barangay Duljo Fatima; Celsa Veldosola alyas Yokong, 49, molupyo sa Barangay Lorega San Miguel.
Dugang nadakpan mao nga sila si Jonathan Saraga alyas Dodong, 33, ug Romeo Calinawan, 54, nga giingong naabtan nga mga kustomer ni Dingtol.
Nasakmit sa maong ronda ang moabot na sa P340 mil nga kantidad sa shabu atol sa buy bust pasado alas 6:00 sa sayong kagabii niadtong Miyerkules.
Usa ka Leopoldo Gabuya alyas German, 64, ug molupyo sa Barangay Pardo, kinsa gidakop sa laing hugna sa buy bust sa mga operatiba.
Si PCapt.Joffrey Grande sa Regional Special Operations Group (RSOG) 7, maoy nangulo sa operasyon nga nakuhaan si Gabuya og shabu nga mobalor og kapin sa P40 mil nga shabu sa iyang posiyon.
Si Gabuya nagpaabang og mga kwarto sa Pardo apan nag-sideline sa pagpamaligya og drugas.
Monitoring
Gipakusgan karon sa Police Regional Office (PRO) 7 ang ilang intelligence monitoring human gibutyag sa Director sa National Capital Region Police Office Police Brigadier General Debold Sinas nga ang posibling kabahin sa drugas nga ilang nasakmit nga mokapin sa 300 kilos adunay bahin niini nga alang sa Central Visayas.
Matod ni Sinas nga ang tanang drugas nga makuha sa Sugbo gikan gyud sa kaulohan ug dako ang posibilidad nga adunay alang sa rehiyon 7.
“Yung nag tanong kanina kung anong downline nito? isa sa mga downline is the Central Visayas, kase nung duon ako na assign pag may malaki mahuli dito (CV) kagaya ng inilagay sa tea bag hinahanap namin para ma locate namin kung saan ang possible source," matod ni Sinas.
Si Sinas, kanhi direktor sa PRO 7, sulod sa usa ka tuig ug upat ka buwan, nakasakmit og P1.2 billion nga balor sa illegal nga drugas.
Si PColonel Giovanie Maines, officer-in-charge sa Cebu City Police Office (CCPO) ug kasamtangan nga Deputy Regional Director for Operation sa PRO 7 nagkanayon nga ilang gihingosan ang monitoring base sa maong impormasyon.
Ilang bantayan ang posibling pag abot sa supply sa drugas nga gipang sulod sa tea bag nga giingong gikan sa gawas sa nasud.
“Pinaigting na natin ang ating intelligence monitoring tungkol dyan baka may papunta nga sa Central Visayas sa mga nakuhang drugs duon sa NCRPO,” matod ni Maines.
Iyang gimandoan ang Mambaling Police Station nga palawman ang imbestigasyon sa pagkasikop sa managsuon.
Ang maong mga binulto nga ilegal nga drugas gisulod usab kinig Chinese tea bag.
Si Talosig, hepe sa Mambaling Police, nitug-an nga sa ilang gihimong nga imbestigasyon sa managsuon pulos niingn nga wala sila makaila sa nag-supply sa drugas.
“Code name ra gyud sila, wala gyud sila magka ilhanay silang tanan,” matod ni Talosig. (AYB, BBT)