MAGUINDANAO PROVINCE -- Taliwala sa pagkaiglas ni Kumander Abu Toraife sa Bangsamoro Islamic Liberation (BIFF), wa gisuwerte ang igsuon ug anak niini human napatay atol sa binakbakay ug pagkailog sa pinadako nilang kampo sa way puas nga opensiba sa militar alas 2 sa hapon niadtong Miyerkules, Nobyembre 27.
Gawas sa nahisgutan, lain pang tulo nila ka mga miyembro ang nakabsan sa kinabuhi.
Giila ang napatay nga sila Akhmad Abdulmalik, igsuon ni Shiekh Esmail Abdulmalik alyas Kumander Abu Toraife; Ansari Esmail, anak niini; ug si Johari Abdulatip nga bomb expert.
Sa taho gikan sa 601st Brigade, Philippine Army, nasayran nga nasulod sa puwersa sa 33rd Infantry Battalion ug 12th Special Forces Company sa 5th Special Forces Battalion ang Barangay Pusaw, Shariff Saydona Mustapha sa nahisgutang probinsiya nga sentrong gilubluban sa mga BIFF.
Una nailog ang kampo sa BIFF, gikanyon pa kini sa mga sundalo pinaagi sab sa pag-abag sa duha ka MG-520 attack helicopters sa Philippine Air Force.
Mismo ang mga barangay opisyal nagkompirma sa bansagon sa mga napatay nga mga BIFF.
Narekober sa Joint Task Force Central sulod sa kampo sa BIFF ang mga tag-as nga matang sa armas, improvised explosive device (IEDs), bala ug kagamitan sa paggama og bomba.
Nasayran nga una nasulod ang kampo sa BIFF naghitak ang mga bomba nga narekober isip lit-ag nila batok sa mga sundalo.
Gipakusgan pa sa Joint Task Force Central ang paglutos sa BIFF ning panahona aron hingpit na kining mapuhag. (Edgar E. Fuerzas)