SUPERBALITA DAVAO

191 patay sa HIV-Aids sa Davao Region

(Sunstar Davao file photo)

NIKALAS og dul-an 200 ka mga indibiduwal sa Davao Region ang human immunodeficiency virus-acquired immunodeficiency syndrome (HIV-Aids) sa unang tunga sa tuig sa 2019.

Kini sumala pa sa Davao City Reproductive Health and Wellness Center (RHWC).

Gikanayon ni RHWC head Dr. Jordana Ramiterre nga base sa datus sa Department of Health-Epidemiology Bureau (DOH-EB), ang rehiyon nitala og kinatibuk-ang 191 indibiduwal, kon diin 137 niini gikan sa dakbayan sa Davao.

Matud ni Ramiterre nga ang ihap sa rehiyon mao ang ikalima sa rankings nga dunay pinakadaghan nga kaso sa HIV-Aids nga 3,476, kon diin 2,902 niini gikan sa Davao City.

Apan gikanayon niini nga dunay pipila ka mga indibiduwal kinsa “tested” nga positibo sa siyudad nagagikan sa kasikbit nga mga probinsiya.

“Baka medyo tumaas ang kaso dito dahil sa influx of population,” butyag ni Ramiterre niadtong Huwebes, Nobyembre 28, atol sa iSpeak media forum sa City Hall sa siyudad sa Davao.

Sumala sa DOH-EB, ang National Capital Region nanguna sa pinakadaghan og kaso sa HIV-Aids uban sa 23,634, gisundan sa Calabarzon nga 11,122, unya Central Luzon nga 8,341, Central Visayas nga 5,561, ug Davao Region.

Gibutyag ni Ramiterre nga kadaghanan niadtong nakakuha sa kagaw mga lalaki, samtang ang vulnerable age group gikan sa 15 hangtud 34 anyos, nga gikonsidera isip “reproductive age group”.

Matud pa niya nga ang pagtaas sa ihap “multifactoral”, kay puwede siyang makuha pinaagi sa di luwas nga pakighilawas, hereditary, o blood transmission.

Ang opisyal sa panglawas nagsulti sab nga ang social media mahimong usa sa mga factor sa pagtaas sa kaso sa HIV-Aids sa nasud, kay ang pagpangita og sexual partner dali na lang kaayo.

Hinuon niingon siya nga ang datus di pa gihapon makonsidera nga “accurate”, tungod duna pay mga indibiduwal wala pa ma-“tested”, apan nakakuha na sa kagaw.

Samtang, gitin-aw niya nga ang pagtaas sa ihap sa kaso dala sa pagpalugway testing ug treatment centers sa gobyerno.

Sa Davao City, gikanayon ni Ramiterre nga dunay kapin 300 centers nga naghanyag og HIV-Aids testing ug treatment.

Sumala niya nga ang RHWC naglusad na karon og community-based testing, aron sa pagdasig og dugang mga indibiduwal aron nga ipailawom sila sa pagsusi.

Nag-apud-apod sab sila og pre-exposure profilaxis isip preventive measure sa mga indibiduwal nga wala pa makakuha sa HIV/Aids, apan vulnerable nga makakuha sa kagaw.

Matud niya kinahanglan nga pakusgan pa ang information campaign sa mga tulunghaan ug sa mga komunidad.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph