USA ka 40-anyos nga babae nga giingong asset sa pulis ang gipusil patay sulod sa balay sa iyang kapuyo sa Sitio Missionaries, Barangay Suba, dakbayan sa Sugbo kaganihang alas 12:30 sa kadlawn, Nobyembre 29, 2019.
Giingong tulo ka wala mailhing lalaki ang nisulod sa balay ni Vicenta Abaño, alyas Venji, ug nipusil niya sa makadaghang higayon, nga niresulta sa iyang kamatayon.
Sigon ni Police Corporal Carlos Irizari sa San Nicolas Police Station nga natulog lang unta si Abaño sulod sa balay sa iyang kapuyo nga naila sa pangan nga Omay nga wala niadtong tungora sa dihang gisulod sa mga suspetsado ang balay ug gibirahan ang biktima.
Dugang ni Irizari nga posibleng gigunitan si Abaño ug gipa om-om sa boka sa armas ang iyang baba ug dayon pusil.
"Ang problema namo karon kay walay mo tug-an kon kinsa ang misulod,Duna man siguro apan dili gyud mo tingog," sigon ni Irizari.
Nakaangkon og samad pinusilan sa sa baba, liog ug ulo si Abaño sa dihang gisusi ang iyang patayng lawas sa mga sakop sa Scene of the Crime Operatives (Soco).
Gitoohang gisundan ang biktima sa iyang pag uli sanglit naka adto pa kini sa police station ug mipahibawo nga ang iyang bana giingong gidala sa wala mailhing lalaki.
"Niadto pa gali ni ganina sa estasyon ug mao nalang ni ang among nadawat nga gipatay na,Pero nahibal-an nako nga ang amahan diay sa iyang kapuyo ang nagkuha sa ilang balay pero walay nakabalo kon asa," dugang ni Irizari. (Superbalita Cebu)