PATAY nang napalgan ang usa ka manicurista ug manghihilot sa usa ka dalan sa Sitio Cambaog, Barangay Pulangbato, bukirang barangay sa dakbayan sa Sugbo, kaganihang alas 6 sa buntag, Biyernes, Nobyembre 29, 2019.
Ang maong babaye nga biktima naila nga si Mila Gabayan, 35 anyos, taga Sitio Candarong, Barangay Pulangbato.
Nakaangkon si Gabayan og samad pinusilan sa ulo ug apapangig. Wala pa masuta kung unsang klaseng armas ang gigamit para sa pagpatay sa biktima.
Si PCpl.Michael Angelo Singson sa Talamban Police Station nga maoy naghawid sa maong kaso niingon nga wala pa silay matumbok nga posibleng mamumuno nga mihimo sa pagpatay kang Gabayan sanglit nga walay bisan kinsa nga tao ang nakakita sa pagpamusil niini.
"Kana man gud alas 5:30 sa buntag paingon pana hayag gikan sa ngit ngit unya dili kaayo daghang tao ang mag labayan nianang orasa sa dapit kung asa napalgan ang patay nga lawas ni Gabayan," sigon ni Singson.
Dugang ni Singson nga gitan-aw ang personal grudge nga maoy posibleng motibo sa pag patay kang Gabayan apan palapdan pa nila ang ilang imbestigasyon. (Superbalita Cebu)